Goizetik 01:00ak arte, herriko elkarte ezberdinen ekintzak egon ziren, besteak beste, aisialdi hezitzaileekin haurren txokoa, Bizindar taldearen herri kirolen erakustaldia, Bleibet abesbatzaren kantupoteoa, trikitixa eskolako kale animazioa, Otsati elkarteko txosna, Hiriskakoen txokolatada, Artziniega Museoaren talo tailerra, Trakamatraka soinu tresna berrerabilgarrien aurkezpena, Diskotxantxa ikuskizuna, Aiaraldeko bertso eskolaren saioa edota Artzirock elkartearen kontzertuak. Barau eta Akerbeltz taldeek girotu zuten gaua.
Festa bidez eskertu eta babestu zuten Aiaraldea hedabidearen jarduna; Artziniegako EAJk -aurrekontuak onartzeko PPren abstentzioa eskuratzeko- hitzarmena kendu baitio komunikabideari. Hori dela eta, herritar eta elkarteek egun osoko egitaraua osatu zuten. Batetik, hedabideari babes ekonomikoa luzatzeko. Eta, bestetik, Artziniegako Udalari hitzarmena berrezartzea eskatzeko; euskararen normalizaziorako instituzioaren bultzada beharrezkoa dela iritzita. Hala, jai bidez aldarrikatu zuten Artziniegan euskaraz bizitzeko nahia, eta horretarako euskarazko proiektuen beharra.