Joseba Vivanco EH Bilduko alkategiaren aurkezpenean Kike Fernandez de Pinedo ere aritu zen

Artziniega Museoa hautatu zuen EH Bilduk atzo herriko alkategaia Joseba Vivanco aurkezteko, eta Arabako Foru Aldundiko zerrendaburuak ere babestu zuen artziniegarra.

Herriko zein inguruko hautagaiak -Iñaki Ibarluzea eta Natxo Urkixo, besteak besteak- egon ziren atzo Joseba Vivanco EH Bilduko alkategaiaren aurkezpenean Artziniegan. Kike Fernandez de Pinedo Arabako Foru Aldundiko koalizioko zerrendaburuak ere parte hartu zuen ekitaldian.

Joseba Vivancok gogoratu zuen aurreko hauteskundeak irabazi zituela EH Bilduk, nahiz eta alkatetza ez lortu, PPren botoaren ondorioz. Halaber, goraipatu zuen oposizioan ere gobernatu dutela, udal gobernuko erabakietan eragiten: igerilekuen tabernaren irekieran, autobus geltoki berria eskatuta...

Dena den, modu zorrotzean kritikatu zuen EAJren agintaldia, eta Vivancok adierazi zuen herria ezer ezean geratzen ari dela jeltzaleen ezintasunagatik. Etnografia museoaren edo errepide konkorren adibideak jarri zituen.

Hautagaiaren ustez, EH Bilduk talde gaztea eta eraginkorra osatu du eta, bereziki, politika egiteko bestelako jarrera eskaintzen dute, partaidetza eta herritarren iritzia aintzat hartuta.

Koalizioaren helburua da 5 ordezkari eskuratzea hauteskundetan eta zuzenean alkatetza lortzea. Euren asmoak dira, besteak beste, ibilbide laua eraikitzea Artziniegan herritarrek paseatzeko -orain mendira jo behar baitute derrigorrez- Dorreko Hotela funtzionatzea berriro, ur saneamendua hobetzea eta, nola ez, Artziniega Museoa berriro irekitzea. 

Horretarako, azpimarratu zuen EH Bilduko beste ordezkarien laguntza izango dutela Eusko Legebiltzarrean edo Arabako Batzar Nagusietan. Horien artean egongo da Kike Fernandez de Pinedo.+

Oharra: Eduki hau herritar eta bazkideen laguntzari esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitzuen.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide