Gehiengo absolutuarekin irabazi ditu EH Bilduk udal hauteskundeak Artziniegan, 469 botorekin. Bigarren zerrenda bozkatuena EAJrena izan da (361 boto), PPren (103 boto) aurretik. PSE-EEk ez du ordezkaririk lortu, 41 boto jaso baitutu soilik. Parte hartzeari dagokionez, 1.422 herritar zeuden deituta bozkatzera, eta 1.024k erantzun diote deialdiari. Abstentzioa, beraz, %24,37koa izan da, 2015ean (%29,87) baino 5 puntu gutxiago. Espainiako Barne Ministerioak baieztatu duenez, 22 bozka zuri egon dira, eta 28 izan dira baliogabeak.
“Gauzak egiteko modu berria”
Joseba Vivanco oso pozik agertu da lortutako emaitzekin. “Bi lelo aukeratu genituen kanpainarako, ‘Aurten bai’ eta ‘Eman bostekoa’, eta bost zinegotzi lortu ditugu, helburuak bete ditugu beraz”. Gehiengo absolutua lortuta, malgutasun handia izango dute datozen lau urteetan gobernatzeko. “Proiektu asko daude mahai gainean, aurreko legealditik datozenak. Gero guk gure proiektu propioak plazaratuko ditugu”.
Hala ere, Vivancok argi du gauzak egiteko beste modu bat izango dutela. “Jendearekin kontatu nahi dugu, hori izango da gure lan eredua, jendearen parte hartzea sustatzea”.
Zinegotzien zerrenda berria
Ondorioz, ondorengo zinegotziek osatuko dute Artziniegako Udala datozen lau urteetan:
- Joseba Vivanco Retes (EH Bildu)
- Zuriñe Frutos Gutierrez Barquin (EH Bildu)
- Unai Gotxi Kastresana (EH Bildu)
- Arkaitz San Jose Martinez (EH Bildu)
- Alazne Lafragua Ureta (EH Bildu)
- Encina Castresana Astarloa (EAJ)
- Jose Miguel Vadillo Ribacoba (EAJ)
- Miren Izaskun Perez Barragan (EAJ)
- Joseba Elejalde Ribacoba (PP)