Artziniegako Jai Batzordeak sare sozialetan adierazi duenez, aurten ez dituzte ekintzak antolatuko irailean: "Birusak utzitako egoera dela medio, Artziniegako Udalak eta Jai Batzordeak aurtengo jaiak bertan behera uztea erabaki dugu".
Ildo beretik, zentzuz aritzeko deia zabaldu dute, "arretaz jokatzekoa". Berri txar gisa atera dute oharra, baina itxaropen mezua luzatu dute, hurrengo urteko irailean elkar ikusteko esperantzan herriko jaiak goraipatuta. "Aurten, irailaren lehenengo asteburuan ez ditugu Doña Tomasa, Gizena eta Argala jaiei hasiera ematen ikusiko, ez dugu Goiko Plaza pintxoz eta tortillaz beteko, ez ditugu playback txapelketan eta bonbona lasterketan bizi den urduritasuna sentituko, ez gara bustiketan hunkituko eta ez diegu jaiei amaiera on bat emango. Tristea eta zorigaiztokoa izan arren, hurrengo urteko jaiak gogoz ospatuko ditugu!", azpimarratu du Artziniegako Jai Batzordeak Facebooken.
Ekintza bakan batzuk aurrera
Unai Gotxi Kastrexana kultura zinegotziak Aiaraldea Hedabideari jakinarazi dionez, jardueraren bat eskaintzeko asmoa du udalak, "egoera larritzen ez bada". Horien artean daude Magialdia, antzerkia, herri kirolak eta Zinegoak festibalaren proiekzioa.
Edozelan ere, prebentzio eta osasun neurriak indartzeko eskatu die artziniegarrei: "Badakigu zer egin behar dugun, prebentzio neurriak ezagutzen ditugu, beraz, arduraz jokatu dezagun egoera txarrera joan ez dadin".
Horrelakoak izan ziren iazko festak:
Jaien inguruko irudiak eta erreportajeak "Artziniega jaietan" atari berezian ikusi daitezke.