COVID-19 kasuek gora egin zutela eta, bandoa argitaratu zuen udal gobernuak udalerriko perimetro konfinamendua iragartzeko. "Agintari eskudunek ez zuten inoiz erabaki udalerria ixtea eta, beraz, ordu batzuetara zuzendu behar izan zuten erabakia", adierazi dute jeltzaleek oharrean. Anabasa eta nahasmen egoera eragin zuen horrek auzokideengan, Encina Castresana EAJko bozeramailearen iritziz: "Beste behin ere Vivancoren atal esperpentiko batera joan ginen. Errejidore baten aurrean gaude, eta ez du bere akatsen erantzukizunik hartzen".
Garbiketa lanak indartzeko eskatu zuen EAJk udal aurrekontuetako emendakinetan. "Tematzeari esker, osoko bilkuraren ostean badirudi eragina izan duela eta behingoz gauzatuko dela", azpimarratu du Castresanak. EAJren ustez, planifikazioa behar du Artziniegak garbiketa bermatzeko: "eskolako zenbait gurasok adierazi digute haserre daudela, ez direlako behar bezala betetzen ari".
Udal igerilekuak eta lan poltsa
Igerilekuetako obren harira era kezka azaldu du alderdiak: "Ez dago behin betiko irekiera datarik, kontrol falta gorabehera. Hori da alkatetzaren kudeaketa negargarri eta ezegonkorraren beste adibide bat".
Amaitzeko, lanpostuen zerrendaren inguruan ere mintzatu dira jeltzaleak, "ez baita lanpoltsarik ez aurreikuspenik egin".