Sofia Erreginaren Sarien 58. edizioan hautatu dute berriro Jose Mari Pinto Rey margolaria, 180x180 zentimetroko kategorian, hain zuzen. A la luz de Selene lanarekin lortu du hori.
Berez, ez da lehenengo aldia sortzailearentzat, honekin bost aldiz izendatu baitute lehiaketa horretan. Iaz Mikel, bere semearekin, batera izan zen aukeratua eta ilusio berezia egin zion. Gainera, biak geratu omen dira saria irabazteko zorian, bozka bakarragatik ez baitzuten lortu.
Sari horren bultzatzailea Espainiako Margolari eta Eskultore elkartea da eta Sofia Erregina emerituak zuzentzen ditu, oro har, banaketa ekitaldiak, nahiz eta iaz ez egin.
Aiaraldea Komunikabideari aitortu moduan, Pinto ez da monarkikoa, baina ezustean bizi izan zuen erreginak duen jarrera sariari dagokionez: "Banan banan geratzen da parte hartzaile guztiekin obren inguruan solasten. Bestelako lehiaketetara agertzen diren ordezkari publikoek baino askoz interes gehiago duela demostratu dit niri. Zentzu horretan ,asko harritu nau erreginak".
Monarkikoa ez den arren, Artziniegan bizi den sortzaileak ezohiko harremana dauka Sofia Erregina emerituarekin, berak eman baitzion BMW Sariaren ohorezko domina. Aitortza hori 2014an jaso zuen eta bere izena eta lana zabaltzeko baliogarria izan zen.