Gutxi falta da Artziniegako jaiak pizteko. Bihar, iluntzeko bederatzietan, Goma Bi kuadrilla historikoko kideek piztuko dute festen lehenengo suziria, udaletxe zaharreko balkoitik. Une horretatik aurrera bi asteburuz luzatuko da festa hiribilduko kaleetan barrena.
Kuadrillek protagonismo berezia izango dute, eta hainbat aukera izango dituzte euren artean lehiatzeko
Ohikoan bezala, kuadrillek protagonismo berezia izango dute, eta hainbat izango dira euren artean lehiatzeko izango dituzten aukerak: kulero eta galtzontzilo lasterketa, playback lehiaketa, iturritik iturrira kronoeskalada, herri-kirol norgehiagoka... Nola ez, aurtengo pregoilariek antolatutako garrafa eta bonbona lasterketak ere garrantzia berezia izango du.
Musika eskaintza ere ez da faltako; tokiko zein eskualdetik kanpo etorritako musikariak igoko dira Hiriko Atean jarriko duten eszenatokira. Ostiralean Gaualdi Herrikoiak eta Dj Vithyk girotuko dute festen lehenengo gaua. Larunbatean, berriz, Kresala erromeriak emango dio segida XI. Playback lehiaketari.
Asteartean -irailak 5- herriko gazteenek Pirritx, Porrotx eta Marimototsekin irri, dantza eta kanta egiteko aukera izango dute, 19:00etan Toñin Luengas Frontoian. Irailaren 7an, ordea, La Furiak jarriko dio erritmoa Gazte Egunari, eszenatokia ondo ezagutzen duen Dj Vithyrekin batera. Azkenik, Fito & Fitipaldis taldearen bertsioak egiten dituen Viene y Va taldeak, Dj Blessive, Duo de Txitxo, La Excavadora eta Nonbait erromeria izango dira bigarren asteburua girotzearen arduradunak.
Hemen kontsultatu daiteke Artziniegako jaietako egitarau guztia.