Edgar Hernandez Artziniegako jai batzordeko kideak Aiaraldea Komunikabideari esan dionez, prestaketa lanetarako asanblada irekiak egiten ibili dira nahi duenak parte hartu zezan, eta lan talde bat osatzen saiatu dira ere lanak eta ardurak banatzeko. Izan ere, orain bi pertsona daude jai batzordean, eta jendea bilatzen saiatzen ari dira: “Lantalde horretan jendea sartzea nahi dugu, etorkizunean jaien ardura har dezaten. Nik bost urte daramatzat eta dagoeneko aldaketa behar da, jende gaztea etorri behar da eta beraiek arduratu behar dira. Jende gazterik gabe ez dago jairik”.
"Jende gaztea etorri behar da eta beraiek arduratu behar dira. Jende gazterik gabe ez dago jairik"
Abuztuaren 30ean, ostiralean, hasiko dira jaiak. Aurten, Artziniega Museoa kudeatzen duen Artea Etnografia Elkartea izango da jaietako pregoilaria, 40. urteurrenaren testuinguruan. 21:00etan izango da txupinazoa, Goiko Plazan. Aurretik, 18:00etan, txupinazo-aurrea egongo da LaMoscaGao-ren eskutik. Gauean, ohikoa den kulero eta galtzontziloen lasterketa egingo da Herriko Atetik, eta DJak emango dio bukaera jaien lehenengo egunari. Gainera, 20:15ean, eraso sexisten aurkako gune morea egongo da Goiko Plazan.
Aurten, Artziniega Museoa kudeatzen duen Artea Etnografia Elkartea izango da jaietako pregoilaria, museoaren 40. urteurrenaren testuinguruan.
Abuztuaren 31a, larunbata, egun handia izango da. Izan ere, egun horretan egingo da bazkari herrikoia, eta baita XXX. Bonbonen Munduko Lasterketa, XVI. Garrafoi Lasterketa eta XII. Playback Lehiaketa ere. Edgar Hernandezek Aiaraldea Komunikabideari azaldu dionez, jendeari gehien gustatzen zaizkion ekimenak playback-a eta bonbonen lasterketa dira: “Urte asko daramatzagu playbacka egiten eta urtetik urtera gero eta jende gehiagok parte hartzen du, aparkalekua bete egiten da. Bestalde, iaz 30 urte bete zituen bonbona lasterketak, eta jendeari gustatzen zaio, goiko kalea betetzen jarraitzen da eta jendeak parte hartzen jarraitzen du”.
“Urte asko daramatzagu playbacka egiten eta urtetik urtera gero eta jende gehiagok parte hartzen du. Bestalde, iaz 20 urte bete zituen bonbona lasterketak, eta jendeari gustatzen zaio”
Igandea, irailaren 1a, meza eta enkantearekin hasiko da, eguerdi partean tabernaz-taberna lasterketa egongo da; eta arratsaldean, berriz, kronoeskalada eta dantzaldia. Berakatz-zopa janak emango dio amaiera egunari.
Astelehenean, irailaren 2an, Herriko Mus Txapelketa izango da ekintza bakarra, frontoian, 16:00retan.
Umeen eguna ospatuko da asteartean, irailaren 3an. Puzgarriak, bazkaltzeko makarroiak, apar festa, Yogurinha Borovaren ikuskizuna, txokolatada eta frontenis txapelketako finalerdiak egongo dira.
Asteazkenean, irailaren 4an, berriz, nagusien eguna izango da. Bazkaria, bingoa eta swing kontzertua egongo dira.
Ostegunean, irailaren 5ean, gazteak izango dira protagonista. Mendi martxa, poteoa, bazkaria, herri-jokoak eta DJa egongo dira.
Kirola eta kuadrillak nabarmenduko dira ostiralean, irailaren 6an. Frontenis eta artzikirol txapelketetako finalak eta areto futboleko partida antolatu dira, eta baita kuadrillen afaria ere. Gauean, berriz, Los Inhumanos taldeak kontzertua eskainiko du. Edgar Hernandezek azaldu duenez, aurten gazteentzat ez den kontzertu handi bat ere ekarri nahi dute, izan ere, adineko jendea ere etortzera gonbidatu nahi dute, ez bakarrik gazteak.
Irailaren 7an, larunbatean, herri bazkaria, Arteko zelaitik jaitsiera, esku pilota partidua, Julen Axperen ikuskizuna, La Basuren kontzertua eta DJ Egoitza egongo dira.
Jaiak behar bezala agurtzeko, irailaren 8an, igandean, tortilla eta marmitako txapelketa, txirrindularitza lasterketa, herri kirolak, odoloste dastaketa, kontzertua eta traka finala egongo dira, besteak beste.