AEME Artziniegako merkatarien elkarteak oharra zabaldu du salatzeko Kutxabankek 45 egunez itxiko duela hiribilduan duen bulegoa. Horrek, taldearen iritziz, kalteak ekarriko ditu arlo anitzetan.
Izan ere, itxialdia herriko jaietara luzatuko da eta arazoak ekarriko dizkie herriko negozioei "eguneko kutxen diru sarrerak egiteko, txanponak aldatzeko eta intzidentziak konpontzeko".
Horrez gain, AEMEk uste du 45 egunez zerbitzurik ez ematea eragina izan dezakela ere kutxazain automatikoan, bai barruan dituen bileteak agortuko direlako (bereziki jaietan) edo matxurak gertatu ahal direlako, bisitari eta turistei dirua eskuratzea galarazita.
Azkenik, elkarteak gogoratu du adinekoak bazterketa finantziario egoeran gera daitezkela arrakala digitalagatik, bulegoan bertan behar dutelako laguntza kudeaketak gauzatzeko.
Kutxabankeko zuzendaritzari exijentzia
Gauzak horrela, AEMEk formalki eskatu dio Kutxabankeko zuzendaritzari atzera egitea itxialdiaren erabakian eta arreta duina bermatu dezala Artziniegan.
Bulegoen itxierek polemika ekarri dute Aiaraldera
EAEko kutxak fusionatu eta pribatizatu zirenetik, ugariak izan dira herritarrek salatu dituzten arazoak Kutxabankekin. Izan ere, hainbat udalerritako egoitzak itxi edo bulegoen kopuruak murriztu dituzte.
Artziniegan, esaterako, 2020an udako itxialdiaren kontra agertu ziren, 2017an Okondo eta Aretako bulegoek ere utzi zioten zerbitzua emateari eta mobilizazioak deitu zituzten. 2021ean, aldiz, Laudio igaro zen hiru bulego izatetik bakarra edukitzera eta horrek ilarak eta protestak sortu zituen.