Bi astez itxita egon ostean, abuztuaren 19an ireki zituen ateak berriz Artziniegako Museo Etnografikoak. Gida zerbitzuen esleipen berria gauzatu bitartean egon da itxita museoa. Izan ere, uztailean amaitu zen aurreko kontratua, eta Artadi SC enpresari esleitu zaio kontratu berria.
Irekierarekin batera 2027ko apirilera arteko ordutegia ere egin dute publiko. Asteazkenetik igandera bitarte bisitatu ahalko da museoa, 11:00etatik 14:00etara. Larunbatetan arratsaldez bisitatzeko aukera egongo da ere, 17:00etatik 19:00etara.
Artziniegako Udalak azpiegituraz gozatzeko gonbita luzatu die herritar zein bisitariei: "Berrirekitze hau une egokia da gure Museoa bisitatzen jarraitzeko, erreferente etnografikoa baita Artziniega ez ezik Aiaraldeko eskualde osoa bisitatzen duen ororentzat".
Iaz ospatu zuen Artziniega Museoak 40. urteurrena. Baina proiektuaren etorkizunerako mugarri garrantzitsuena 2022ko otsailean jarri zuen. Bi urtez luzatu zen negoziazio prozesuaren ondotik akordioa sinatu zuten Artea elkarteak, Artziniegako Udalak eta Arabako Foru Aldundiak Artziniegako Etnografia Museoaren etorkizuna bermatzeko. Lau urterako akordioa beste lau urtez luzatzeko oniritzia eman zuen Foru Aldundiak iragan abenduan.
Udalak balioan jarri nahi izan du Artziniegako Museo Etnografikoaren "kalitatea eta garrantzia". "Artziniegako Museoa bere espezialitateko euskal museo onena da, bisitariek egunero bisita liburuan uzten dituzten iritziek erakusten duten bezala. Bisitari horien artean, azken urteetan Frantziako Estatuko turisten presentzia gero eta handiagoa nabarmentzen da", adierazi du esleipen berriaren berri jakinarazteko igorritako oharrean.