Ostiralean zendu da Benjamin Respaldiza apaiz artziniegarra Angolan, bertan baitzegoen misiolari lanetan. Luandatik Malanjera bidaiatzen zegoen obra baten inaugurazioan parte hartzeko bihotzeko bat eman zionean, Gasteizko Elizbarrutiak azaldu duenez.
Erakunde erlijiosotik nabarmendu dutenez, artziniegarraren heriotzak samin handia eragin du Gasteizko elizan, eta baita Ekuadorren eta Angolan ere, bi herrialde horietan jardun baitzuen bere ibilbidean zehar.
Respaldiza 1947an jaio zen Artziniegan eta 1972an bilakatu zen apaiz. Erakunde katolikoko kideek azaldu dutenez, "misioilari espirituak" markatu zuen bere bokazioa hasieratik, pertsona pobretuenen alde eginez.
Angolan abiatu zuen Respaldizak bere ibilbidea misiolari lanetan, bertako guda zibil betean.
Gauzak hala, 1973tik 1980ra egon zen Angolan, eta gertutik bizi izan zuen bertako guda zibila. Ekuadorrera joan zen gero. Los Rios probintzian egon zen batez ere jardunean. Egonaldi horretatik bereziki nabarmendu dute La Yucako nekazaritza komunitatearen defentsan izan zuen inplikazioa, bertako bizilagunak euren lurretatik bota eta herriko etxebizitzak eta eskola suntsitu zituztenean.
Bere bizitzaren zati handi bat eskualdetik kanpo eman zuen arren, Respaldizak harreman estua mantendu zuen Artziniegarekin eta Aiaraldearekin, apaiz moduan jardun baitzuen, hainbat ekimen sozial eta kulturaletan parte hartzearekin batera, Artziniega Museoan kasu. Horren mugarria izan zen 2022an Artziniegan bertan jaso zuen omenaldia, apaiz moduan mende erdi bete zuenean.
Aiaraldea Komunikabideak iaz elkarrizketatu zuen Respaldiza, bere bizitza eta ibilbidearen inguruan galdetuta.