Pasa den larunbatean, irailaren 28an, plataformak herri-batzarra antolatu zuen, Foru plazan egin duten bigarrena. Orain arteko ibilbidea, Bizkaiko Batzar Nagusietan ordezkaturik dauden alderdi politiko guztiekin (PSE, Bildu, PP eta EAJ) jada izandako bilerak eta aurreikusten dituzten hurrengo ekintzak jakinarazi zituzten bertan.
Adierazi zutenez, emango dituzten urratsen artean tokiko alderdiekin banaka biltzea dago, elkarlana ezinbestekotzat jotzen baitute Urduñaren orainari nahiz etorkizunari aurre egiteko. Hortaz, bilerak egiteko eskaerak bidali dizkiete Alternatiba, Aralar, EA, PNV, PP, PSE, Sortu eta URE alderdiei. Asteazkenean EArekin elkartu ziren eta gaurko Sorturekin hitzordua adostu dute.
Horrez gain, Jose Luis Bilbao foru-diputatu nagusiari uztailean bilera-eskaera helarazi ondoren, aste honetan jaso dute erantzuna eta urriaren 14an bilduko dira.
Maiatzean abiarazi zenetik askotariko ekintzak gauzatu ditu plataformak, besteak beste, sinadura-bilketa −ia 1700 jaso ziren−, elkarretaratzeak eta propaganda Urduñan nahiz herritik kanpo.