Emanaldia 19:30ean izango da, 67. Agroekologia Foroaren kariaz, eta dokumentalaren zuzendari Karlos Trijueke euskaldunak eta Danilo Albin gidoilari uruguaiarrak aurkeztuko dute.
Zigorrik gabe dagoen hilketa, ahaztutako aztarnak eta oraindik ere justizia erreklamatzen duen familia, horrela laburbildu daiteke 52 minutuko No me olvides: el año que Videla mató en España dokumentala.
Seme-alabak desagertuta dituen ama erailtzeko asmoz, diktadura argentinarrak bilbatutako estrategia kontatzen da filman. Videlaren diktaduraren eraginez apurtutako familia bateko ama, Noemí Gianotti de Molfino, hilik agertu zen 1980ko uztailaren 21ean Madrilgo hotel batean.
Hiltzaileen zantzuak aurkitu baziren ere, Espainiako demokraziak inpunitatez jokatu eta berehala estali zuen kasua. Ordu berean, Noemíren alaba betirako galduko zen Buenos Aireseko kontzentrazio-esparru batean.
Iraganeko gertaera horiek dokumentalaren bitartez berreskuratu nahi izan dituzte egileek zein Noemíren senideek. Filma ikusteaz gain, zuzendari eta gidoilariarekin mintzatzeko aukera izango dute ikusleek.