Txupinazoa maiatzaren 3an botako dute udaletxeko balkoitik eta 12ra arte iraungo du festa giroak. Ohitura den legez, esku-pilota partida profesionalak jokatuko dira jaietako lehenengo egunean eta maiatzaren 4ean, larunbata, ganadu eta nekazaritzako produktuen azoka egingo da, bai eta Euskadiko txaroles-txapelketa ere. Igandean gastronomiari lekua emango zaio patata-tortilla nahiz paella lehiaketekin. Arratsaldean, errekortadoreak nor baino nor arituko dira zezenen aurrean eta horren ostean bigantxak egongo dira.
Aste bitartean, Otxomaio egunaz gain, umeen eguna eta antzinako gazteen eguna ospatuko dira. Bai umeen bai erretiratuen bazkarietarako txartelak apirilaren 23an (17:00-19:00) eta 24an (9:30-11:30) salgai egongo dira Kultur Etxean (3,50 € umeak eta 6 € erretiratuak).
Jaietako bigarren asteburua ere ekintzez lepo etorriko da. Larunbatean, hipika-kontzentrazioa, Urrezko Aizkora, herri-bazkaria, bola-joko txapelketa eta aurresku-txapelketa egingo dira eta igandean, pil-pil erako bakailao lehiaketa. Azkenik, 2013ko Otxomaioei agur esateko Bihotza eta zapiak erreko dira maiatzaren 12an 21:30ean.