Elkarte urduñarrak hainbat irteera, hitzaldi eta bestelako esperientziak gauzatu ditu jada eta datorren maiatzaren 4rako, larunbata, ibilaldi bat antolatu du gauez.
Ez da lehiaketa izango eta guztira 28 km korrituko dira mendi-bizikletaz. Ibilbideak 800 metro positiboko desnibela izango du, gehienez ere 612 metroko kotarekin. Zaltasun aldetik ertain-erraza dela adierazi dute antolatzaileek.Irteera Urduñako frontoiaren aurrean izango da 20:30ean eta alde zaharretik ibili ondoren, 21:00etatik aurrera ekingo zaio ibilaldiari.
Ibilbidea elementu islatzaileekin markatuta egongo da. Zati batzuk menditik igaroko dira eta beste batzuk partzela-bideetatik. Bizikletak garbitzeko Karcher puntua eta bizikletak gordetzeko zerbitzua egongo dira, bai eta ibilbidearen erdialdean hornidura-gune ere. Frontoian dutxa hartzeko aukera eskainiko da.
Parte hartzeko baldintzak dira, besteak beste, adinez nagusia izatea, kaskoa eramatea eta bizikletaren atzealdean argi gorria edo antzekoa jarrita edukitzea. Bizkarreko zenbakiak egunean bertan har daitezke antolakuntzak jarriko duen karpan, 19:00etatik aurrera. Gainera, parte-hartzaile guztien artean opariak zozketatuko dira.
Izena emateko prezioa 15 eurokoa izango da federatuentzat eta 18 eurokoa federatu gabeentzat eta ordainketa BBKn egingo da (kontu zenbakia: 2095 - 0059 - 41 - 9112449791). Beharrezkoa da parte-hartzea baieztatzea ondoko helbide elektronikora idatziz: gualdetxumbt@gmail.com. Parte-hartzaile kopurua mugatua izango da, gehienez 200 lagun.