1970. urtean orduko apaiz Esteban Martinez de San Vicenteri, aisialdi eskaintza murritza zela ikusita, hiriko haurrentzako udalekuak antolatzea bururatu zitzaion. Jada 40 urte igaro dira harrez gero eta oraindik Urduñako aisialdi taldeak bizirik dirau.
Udan kanpamentua eta udalekuak antolatu ez ezik, urtean zehar ere larunbatero biltzen da taldea haur eta gaztetxoei aisialdi alternatibo eta ezberdina eskaintzeko helburuarekin. Guztira 50 neska-mutil inguruk parte hartzen dute 10 begiralez osaturiko taldeak eurentzako prestatzen dituen ekintza ugarietan.
Atzo aisialdi talde honek bazuen zer edo zer ospatzerik, bere 40. urteurrena, eta horretarako urduñar guztiei gonbita luzatu zitzaien. Goizean ginkana, puzgarriak eta askotariko jolasak egon ziren eta eguerdian 100 pertsona baino gehiagok gurasoek eurek prestatutako menu gozoa dastatzeko aukera izan zuten. Ospakizuna arratsaldeko sei eta erdiak aldera bukatu zen petardo eta zuziriekin.
Aurtengo kanpamentua eta udalekuak
Arabako Izarzan egingo den kanpamentura nagusienak (LHko 5. eta 6. eta DBHko 1. eta. 2 mailak) joango dira uztailaren 4tik 14ra bitartean, txikienek (LHko 2., 3. eta 4. mailak), ordea, Labrazan (Araba) egingo diren udalekuetara joateko aukera izango dute uztailaren 15etik 25era. Oraindik ere lekua dago!