Negua da, hotza eta euria gurekin ditugu. Batzuetan ere elurra erori egiten da gure mendiak zurituz. Ematen du garai hauetan ezin dela gauza askorik egin, eta etxean geratzea dela egokiena.
Guk proposatzen dizuegu, hotz, euri zein elurretarako arropa egokia janztea eta kalera irtetzea. Kaleak hamaika aukera eta jolas eskaintzen dizkigulako.
Behin entzun bezala, ez dago eguraldi txarrik, arropa txarra baizik!
Eta zer egin daiteke euria, elurra... ari duenean?
- Inguruko material naturalarekin itsasontzia sortu eta euriarekin sortzen diren errekatxoetatik bota.
- Tamaina eta edukiera ezberdinetako pitzerrak, edalontziak, lapikoak... uraren azpian jarri eta ikusi ea zein betetzen den lehenengo.
- Ur ibilbideak sortu, lurrean, tuboekin, makilekin...
- Putzuetan plisti plasta salto egin eta ingurua blaitu.
- Elurrarekin iglu bat egin, edo edozein eskultura sortu.
- Material natural ezberdina jaso, hostoak, pinaburuak, adarrak... eta etxean eskulanak eta eraikuntzak egin, moztuz, margotuz. Elementu naturalak margotu daitezke, edo hauek erabili folio bat margotzeko. Edo elementu hauekin mandalak apaindu daitezke...
- Paseatu elurretik begiak estalita.
- Makilak jaso eta makiltxoekin, elurretan mezuak idatzi.
- Ur putzuek aukera ematen dute, ispilu moduan erabiltzeko. Gure islarekin jolas dezakegu.
- Lur bustiarekin buztina sortu eta erakuntzak edo eskulana egin.
- Kalean, euria egiten duenean, oihal bat jarri eta azpian uraren soinua entzun, eta sartuko diren tanta txikiekin jolastu.
- Kartulina batean errotulki edo tenperarekin margotu, kalera atera eta euriarekin zer gertatzen den ikusi. Modu honetan artelan berriak sortu daitezke.
Beraz jantzi zira, praka egoki batzuk eta uretarako botak eta kalera irten jolastera! Kalea hartu eta jolasgune erraldoi bilakatu!