Ganzorrotz mendizale taldeak bosgarren urtez antolatu du udalerriko mendi-ibilaldia. Bi ibilbide izango ditu, 26 eta 12 km-koak hurrenez hurren.
Martxoko lehen igandea aukeratu du aurten ere Ganzorrotz Mendi Kirol Elkarteak herriko mendi-ibilaldia egiteko. Bosgarren urtea da “Artziniega Ibilaldia” antolatzen duela eta ohi lez udalerriko mendi eta basoetan barrena bi ibilbide prestatu dituzte: bata luzea izango da, 26 km-koa, eta horretan Peñalba, Otsati eta Zaballa mendietatik pasatuko dira mendizaleak. Guztira 1400 metroko desnibel metatua izango du.; laburrak berriz 12 km izango ditu eta Soxoguti herritik pasatuz Zaballa mendira joango da, ibilaldi luzearen ibilbidearekin bat eginez. Ibilbide laburra egokia da mendian ibiltzeko ohitura duten umeentzat ere.
Ibilaldi luzea 8:00etan abiatuko da frontoitik, eta laburra ordu eta erdi geroago, 9:30ean. Izena eman daiteke web gunearen bidez otsailaren 27ra arte eta egunean bertan 7:00etatik 7:45era martxa luzerako eta 8:30etik 9:15era martxa laburrerako. Jatekoa eta edatekoa egongo da ibilbide luzean. Frontoian odoloste eta txerriki errea egongo da parte-hartzaile guztientzat 13:00etatik aurrea. Izen-ematea doakoa da.
“Yarri” memoriala
Ibilaldia Jose Manuel Yarritu “Yarri”-ren omenezko ekitaldia izateko asmoarekin jaio zen. Izan ere, Yarritu mendizale sutsua izateaz gain, Artziniegako mendiak, bideak eta txokoak ezagutarazteko lan handia egin zuen. Duela urte batzuk hil zen eta 2010ean hari omenaldi bat egiteko helburuarekin ere jaio zen Artziniega Ibilaldia.
Ekitaldi jendetsua
Aurreko urteetan kirol-ekitaldi honek jende ugari erakarri izan du Artziniegara (iazkoan 800 lagun inguru), gehienak Bizkaitik eta Arabatik etorrita, baina Euskal herriko beste herrialdetatik ere jende asko etortzen da, baita atzerritik ere. Antolakuntza lanetan ere nahikoa jende aritzen da, berrogei boluntario baino gehiago.
Otsaileko irteera, Lunadara
Artziniega Ibilaldiaren aurretik, beste hitzordu bat du Ganzorrotzek: neguko irteera Lunada aldera. Eguraldia egokia bada, asmoa da Castro Valnera mendira igotzea, mendiko eskiekin zein oinez. Antolakuntzatik esan dutenez, derrigorrezkoa da neguko materiala eroatea, hau da, arropa egokia, kranpoiak eta pioleta.