Andrés Garmilla (70 urte), José Ramón Larisgoitia (67 urte), Adolfo Guerrero (67 urte) eta Pedro Zayas (61 urte) laudioarrek erretiratzeari aurre egingo diote modu xelebrean: mandoak hartu eta 1.000 kilometro inguru bidaiatuko dute Huelvaraino Rocioko Ferian parte hartzeko.
Laurak dira San Roke Kofradiako kideak eta bertan Kordobako kofradia batekin anaitu dira -Lucenakoa, alegia- elkarrekin jaia gozatzeko.
Ostiralean abiatuko dira Laudioko erdigunetik.
Mandoak zaintzeko 30 kilometro egunero
Lau gizonezkoak bezain garrantzitsuak izango dira mandoak abentura honetan. Laudioarrek entrenatu dituzte sasoian egon daitezen eta, gainera, 30 kilometro besterik ez dute bidaiatuko egunero.
Julian Larisgoitia bidaiarien lagun eta senideak azaldu du asko zainduko dituztela animaliak eta nahiz eta ibilbide luzeagoak egiteko gai diren, 30 kilometro baino gehiago ez dituztela beteko mina hartu ez dezaten.
Hainbat geldialdi
Eguneko kilometro kopurua mugatu ez ezik, 5 egunean behin atsedena hartuko dute, mandoak osatu daitezen.
Hori dela medio, laudioarrek beste helburu bat gauzatzeko parada izango dute; bidean topatzen duten pertsonekin harremanetan egotea eta euskal izaera zabaltzea.
“Euren xedea da jendearekin hitz egitea eta erakustea euskaldunok oso jatorrak garela”, argitu du Julian Larisgoitiak. Horretarako, denbora nahikoa izango dute, ibilbidea maiatzaren erdialdean bukatuko baitute.
Erretiroa profitatzea
Erronkari esker lau gizonezkoek adierazi nahi dute erretiroak balio dezakeela norberak bere ametsak lortzeko.
Izan ere, Pedro Zayasek Santiago bidea egin du zaldiz.
Mandoak eta gurdia
Abentura egikaritzeko bi mandoa eta gurdia erosi dituzte; mandoak Leonen eta gurdia Tafallan. Berez, erretiratuen ideia da gurdian eta kanpatzeko dendetan lo egitea.
Hori bai, itzuli baino lehen, animaliak eta gurdia saldu beharko dituzte Huelvan bertan. “Ziur pena handia emango diela, asko maite baitituzte mandoak”, erantsi du Julian Larisgoitiak.