Urteak dira Laudioko jaien egutegiak herritarren artean zalantzak sortzen dituela. 2003an ezarritako ereduak ez du herritarren oniritzia lortu. Aurretik 15 egunez luzatzen ziren jaiak bitan zatitu ziren urte hartan. Egutegi berria zehazte aldera, 2014 urte amaieran talde bat batu zen hausnarketa eta eztabaidari hasiera emateko. Helburua bertatik proposamen bateratua lortzea izan bazen ere, zailtasunak medio, azkeneko ondorioetan sei proposamen aurkeztu zituzten.
Proposamenak Udalari aurkeztu zizkioten. Horretaz gain bilera irekia egitea iradoki zioten, jaien prestakuntzan parte hartzen duten norbanako eta kolektiboek, zein eztabaidan interesa duen orok parte hartzeko aukera izan zezan. Hala, urriaren 24an ospatu zuten hitzartutako bilera.
Hitzordu hartan jaietako egutegia finkatzeko garrantzitsuak diren irizpideak identifikatzea izan zuten xede, bi taldetan banatuta. Alde batetik irizpide nagusiak aurkitzen dira. Bertan, egutegia aldatu behar dela onartuta, etenik gabeko jaiak lehenesten dira eta gutxienez asteburu bat eta ahal izanez gero bitan luzatuko direnak. Bigarren mailako irizpideetan berriz, jaiak abuztutik kanpo egitea, Erroke Deunaren inguruan mantentzea eta Bilboko jaien egutegiarekin bat ez etortzea lehenesten dira.
Irizpide horiek oinarri hartuta, 2014aren amaieran abiatutako hausnarketan aurkeztutako sei proposamenak hirutara murriztu dituzte. Lehenean, Erroke Deuna aurreko lehenengo ostiralean hasi eta hurrengo asteko igandean bukatzea lehenesten da. Bigarrenean berriz, uztailan ospatzen jaiak eta azkenengoan, abuztuaren 15ean hasi eta zazpi eta hamar egunean artean luzatzea.
Aurreneko bi proposamenek irizpide nagusi biak eta bigarren mailako beste bi irizpide betetzen dituzte. Hirugarrenak, ordea, irizpide nagusi bakarra eta bigarren mailako bi. Hori oinarri hartuta, Udal gobernuko ordezkariek adierazi dute proposamen bateratu batetara helduko direnaren itxaropena dutela. Horretarako beste lan-saio batzuk antolatuko dituzte.