Hurrengo astelehenean ez ohiko udal osoko bilkura egingo dute Laudion 2016-2017ko Foru Planak jasoko dituen lanak onartzeko. Uztailaren 25ean bukatuko baita proposamenak egiteko epea.
Alderdiek adostasuna lortu dute eta zaharren egoitza ohian eta Zubiko Kurajon lanak egitea proposatuko diote Arabako Foru Aldundiari.
Zaharren egoitza ohia
Laudioko zaharren egoitza ez da erabiltzen duela urte ugari. Herriko erdigunean dago eta Jon Ander Altube alkate ordeak azaldu du helburu soziokulturaletara bideratu nahi dutela.
Hala ere, udal ordezkariak gaineratu du erabilera horiek zehazteko prozesu parte-hartzailea egin behar dela. Bitartean, udalean dauden taldeek ez dute nahi eraikina suntsitzea.
Horregatik Foru Planari begira, udalak eskatuko dio Arabako Foru Aldundiari zaharren egoitza ohian zenbait lan egin ditzan berritzeko eta kontserbazioa bermatzeko. Irisgarritasuna ere moldatzeko eskaera egingo diote.
Zubiko Kurajo
Elorza Maisuko inguruan abiatutako lanak -geltokia, Latiorroko tunela, saneamendua...- bukatzear daude baina oraindik fase bat egiteke dago. Fase hori gauzatzeko ere eskatuko dio udalak Arabako Foru Aldundiari.
Finean, obra horiek Zubiko Kurajoko saneamendua hobetu beharko dute.