Hitzaldia eskainiko du gaur (uztailak 13) Baxkonia Islamiar Kultur Elkarteak Laudioko Kultur Etxeko 17. gelan, 19:00etan. Ramadana eta "ebazpenaren gaua" bezala ezagutzen dena izango dituzte mintzagai.
Ramadama
Antolatzaileek azaldu dute Ramadan hilabeteak "29 edo 30 egun" irauten dituela, "urte bakoitzean Ilargiaren araberako islamiar egutegian zehaztuta datorren bezala".
"Amaitutakoan Aid al Fitr jaia ospatuko dugu Aiaraldeko musulmanok, aurten uztailaren 17an edo 18an izango da (ilargiari begira bezperako arratsaldean zehaztutako data), goizeko bederatzietatik aurrera Gardeako frontoian. Imamaren hitzaldia eta Aiaraldeko familia musulman multietnikoak batzen dituen otoitz kolektiboa egingo ditugu, eta amaieran hamaiketakoa izango dugu, Ahalguztidunaren babesaz". Hala adierazi du musulman elkarteko kide den Alfredo Gomezek, eta gaineratu du Ramadan hilabetea "norbere burua hobeto ezagutzeko aukera ematen duen denbora-tarte berezia" dela. "Eguneko orduetan egiten den barauaren bitartez goragoko egoera espiritualera heltzen gara eta Islamaren praktikaz zein doktrinaz gehiago ikasten dugu, ekintza solidarioak sustatzearekin batera".
Ebazpenaren gaua
Ebazpenaren gaua, berriz, Ramadamaren azken hamar egunetako gau batean ematen da, Gomezek azaldu duenez. Elkarteko kideak adierazi du "Sunnako musulman askoren artean" Ramadaneko 27. eguneko aurreko gauean Ebazpen gaua "meskitan edo etxean senitartean eta lagunartean ospatzeko" ohitura dagoela. "Musulman askok ere Ramadaneko azken 10 egunetan Itiqaf delakoa egiten dute, hau da, meskitan erretiro espirituala egitea, egunotako jarduerei buru belarri ekiteko: ekintza solidarioak egin, ikasi eta otoitz egiteko", gaineratu du Gomezek.
Hitzaldia euskaraz
Antolatzaileek adierazi dute hitzaldia euskara hutsez eskainiko dutela, bertaratzen diren pertsona guztiak euskaraz badakite. Bestela, euskarazko eta gaztelerazko azalpenak tartekatuko dituzte.