Laudioko 28 familiari eman zizkien udalak “mantentze-laguntzak” iaz. Horietako 18ri Diru-sarrerak Bermatzeko Errenta (DBE) kendu zien Lanbidek, eta horregatik jo zuten udalera.
Hala adierazi du Isa Boveda ongizate arloko zinegotziak. “DBE kendu dieten familiak lagundu ditugu, betiere diru-laguntza hori arduragabekeriagatik edota informazioa ezkutatzeagatik galdu ez badute”, azaldu du, eta salatu du Lanbiderekin “arazo asko” ari direla izaten azkenaldian, “malgutasun gutxirekin jokatzen ari dira kasu askotan. Hanka sartze txikienagatik ere ukatzen dute DBE hartzeko eskubidea”.
Eskaera kopuruak gora
Larrialdi Sozialerako diru-laguntzak ere eskaintzen ditu udalak. Iaz 155 familiek eskatu zuten bultzada. 230.000€ bideratu ziren horretarako. Eusko Jaurlaritzak 196.000€ jarri zituen eta Udalak 34.000€. Bovedak nabarmendu du azken hiru urteetan igo egin dela laguntza eskatzen duten familien kopurua, "egoera okerrera doanaren seinale".
Elikagai bankuarekin ere elkarlanean aritzen da Udala. Hain zuzen, iaz 60 tona elikagai banatu zituzten 341 familien artean. Etxegabeen kasuan, berriz, 2016an bazkarietarako 135 bono eta garraiorako 89 txartel banatu zituzten.
