Natxo Urkixori buruzko mezua zabaldu da azken egunetan whatsapp mezularitza aplikazioaren bidez. Mezuaren arabera, Laudioko alkateak ezezkoa eman dio “guraso musulmanek” eginiko eskariari: eskola-jantokietan txerri okela zerbitzatzeari uztea. Urkixok ezezkoa emateko plazaratu omen dituen argudioak zerrendatzen ditu mezuak, kutsu islamofobokoak guztiak.
"Informazio hori guztia faltsua da", baieztatu du Natxo Urkixok. Udalak ez du eskola jantokien gaineko erabakimenik, zerbitzu hori Eusko Jaurlaritzak kudeatzen baitu catering enpresen bitartez. Hortaz gain, mezuak aipatzen duen iturria (“La voz de Alava” egunkaria) ez da existitzen, alkatearen hitzetan. Ez da, gainera, mezu iruzurti hori zabaltzen den lehen aldia, urteak baitaramatzate antzeko bertsioak mundu osoan barrena barreiaturik.
“Gorroto delitua”
“Salaketa jartzeko asmoa dugu, gorroto delitu baten aurrean gaudelako eta gure seme alaben etorkizuna babestu nahi dugulako”. Hala adierazi du Othman Alfredo Gomez-Cambronerok. Laudioko komunitate musulmaneko kideak azaldu du hainbat guraso joan zirela Latiorro Ikastetxeko jantokiaren hurrengo urteko plangintza aurkezteko bilerara, eta bertan proposatu zutela ume musulmanentzako menu alternatiboa sortzea.
“Bilera oso ondo joan zen, normaltasun osoz”, nabarmendu du Gomez-Cambronerok, baina gaineratu du whatsapp mezua horrekin erlazionatua dagoela, bere ustez. “Maltzurkeriaz zabaldu den mezua da”, salatu du, “ikastetxean planteatu genuen ekimena guztiz desitxuratzen du, gezurrak baliatuaz, eta udalaren eta alkatearen izena ere zikintzen ditu".
_tokikom_735x413.jpg)