Abuztuko udalbatzan oposizioko talde guztiek aurkeztutako mozioa onartu dute, Tokiko Gobernu Batzordeko hainbat eskumen udal osoko bilkuraren gain gera daitezen berriro. EH Bildu bakarrik agertu da eskaeraren aurka.
Eskumenak
Tokiko Gobernu Batzordearen menpe dauden zenbait eskumen oso garrantzitsuak dira udalaren funtzionamenduan; izan ere, berez, bertan ebazten dira kontratazioen esleipena, kredituen aldaketa bereziak edo udalaren horniketa kontratuak.
EAJk, PSE-EEk eta Omniak azpimarratu dute ez dela zilegi Tokiko Gobernu Batzordeko eskumenak mantentzea, bertan bi alderdi soilik baitaude ordezkaturik; eta EH Bilduk dauka, gainera, gehiengo osoa.
Eztabaida eta tentsio ugari
Tentsioa izan da nagusi udalbatzan. Bozketa jazo da eztabaida gogorraren ondorioz, eta alkateak udalbatza gelditu behar izan du giroa baretzeko. Izan ere, Txaro Sarasua sozialista hitz egiten hasi da Iñigo Martinez Cerrilloren txanda zen bitartean.Oposizioko alderdi nagusiak, EAJk, argitu du egungo Tokiko Gobernu Batzordearen osaketa ez dela legealdi hasieran onartutako bera: bina ordezkari EH Bildu, EAJ eta Omniarentzat. Hori dela eta behartuta ikusi dute haien burua oposizioaren mozioa babesteko.
Juanma Ibarretxe jeltzaleak azaldu du legealdiaren lehenengo hilabeteetan lortutako akordioaz harro daudela, baina egungo egoera ez dela mesedegarria herriarentzat. Berez, EH Bilduk 4 ordezkari ditu orain organoan eta EAJk ez du parte hartu abuztuan.
Tokiko Batzordearen egoera
Mozioaren eta arazoaren jatorria, neurri batean, Omniaren kanporaketa da; EH Bilduk hala erabaki baitzuen uztailaren amaieran, SOS Laudioko Lamuza Parkeari bidalitako mezu elektroniko baten edukiak direla kausa.
EH Bilduk alderdi independenteari irainak zabaltzea leporatu zion, baita udal funtzionamendua oztopatzea eta joko zikina egitea ere. Omniak, ordea, aitzakiatzat hartu zuen erabakia, gehiengoa berreskuratzeko Tokiko Gobernu Batzordearen taktika politiko gisa. Gaurko udalbatzan errepikatu da tirabira, EH Bilduk aipatu ditu kanporaketa eragin zuen Omniaren mezuaren zenbait lerro (egun Laudion gobernatzen dutenak direla lehen bere ideiak inposatzeko hiltzen zutenak, besteak beste), adierazteko ez dela onargarria Omniak Tokiko Gobernu Batzordean jarraitzea.
Zentzu horretan, Omniak esan du bere garaian barkamenak eskatu zituela eta udal gobernu taldeak ez dituela onartu, bere asmoa delako gehiengoa izatea organoan.
Tokiko Gobernu Batzordea irekia
Horren aurrean, EH Bilduk azpimarratu du hasieratik bere asmoa alderdi guztiak egotea organoan izan dela, baina PSE-EEk eta PPk ez dutela nahi izan parte hartu.
Etorkizuna
Alvaro Barrios Omniako bozeramaileak gogoratu du mozioa ez dela loteslea, eta EH Bilduk erabaki behar duela eskumenak itzuliko dituen edo ez. Horren harira, Iñigo Martinez Cerrillo koalizioaren zinegotziak erantzun du lan egingo dutela Tokiko Gobernu Batzordea berriro irekia izan dadin.