URAk isurketen baimen berria eman dio Laudioko Udalari 4 urterako, baina, aldi berean, betebehar gehiago eskatu dizkio etorkizuneko Basaurbeko araztegirako moldaketa lanak abiatu ditzan.
Hasteko zenbait gai kutsakor isurtzea galarazi beharko du 12 hilabeteren epean. Horrez gain, hurrengo neurriak ere gauzatu beharko ditu tokiko erakundeak:
- Urtero, saneamendu-kolektore nagusira isuritako hondakin uren 24 kontrol egitea.
- Udalerrian hondakin-uren tratamendu sistemen zerrenda, nahiz horien mantentze-programa ezartzea.
- Saneamendu-sarean botatako industria-isurketak kontrolatzeko neurriak.
- 3 hilabeteko epean, isurketa-ordenantza bat onartzea.
- Isurketa-kontrolerako kanona handitzea; joeraren arabera gainbegiratuko da, eta kanon hori hondakin-urak araztegi berrira konektatu arte indarrean egongo da.
- Udalerri-eremuan baimendutako isurketak kolektore orokorrera konektatzearen beharra, teknikoki hala ahalbidetzen denean.
Ibaiaren egoera ekologikoan gabeziak
URAk gogoratu du udal sarean isurtzen diren hondakin-urak zuzen joaten direla ibaira, inolako tratamendu barik. Isurketa titular gutxi batzuek -pribatuk zein publikok- egindako aurretratamenduak daude bakarrik.
"Saneamenduaren kudeaketa eskas horrek isla zuzena du Goi Nerbioiko egoera ekologiko txar iraunkorrean" azaldu du URAk.
Hori guztia dela eta, Espainiako Gobernuari araztegiak eraikitzeko lanak egikaritzeko eskatu dio euskal agentziak. Gainera, tokiko erakundeei gogoratu die egokitu beharko direla azpiegitura berrietara, ahalik eta lasterren.