Transexualitatearen errealitatea geroz eta ikusgarriagoa bilakatzen ari da eskualdean eta ikastetxe ugarik euren egunerokotasunean txertatu dute, herri handietan zein txikietan. Egiten duten lan horren barruan, informazioa da oinarrietako bat.
Zentzu horretan, Laudio Ikastolak hitzaldia gauzatuko du bihar, transexualitatea oraindik arrotza egiten zaien lagunentzat. Berdindu! Eusko Jaurlaritzako norbanako transexualen eta euren senideen eta ingurukoen arretarako zerbitzuak bideratuko du solasaldia.
Kultura Etxeko Arraño gelan izango da ordu eta erdiko saioa, 11:00etan hasiko da 12:30ean bukatzeko. Haurtzaindegi zerbitzua egongo da.
Transexualitatea Aiaraldean; lur azpitik azalera
Transexualitatea eskualdean berria ez bada ere, duela urte gutxi lantzen ari da modu publikoan. Zenbait ikastetxetan gazte transexualekin lantzeari ekin diote eta, beste kasu batzuetan, familiek zabaldu dute gaia jorratzeko beharra. Esaterako, duela hilabete batzuk Luiaondon antolatu zuten hitzaldia zenbait gurasok euren egoera lantzeko.
Duela urtebete, erreportajea argitaratu genuen errealitatea gertutik ezagutzeko, bizipenak zein arazo legalak eta zailtasunak ezagutzeko. Horretarako eskualdeko norbanako transexualak izan genituen hizpide.