Iragan igandean ospatu zen Espainiako Taekwondo Freestyle Txapelketa, Castellonen. Laudioko Taekwondo Klubak emaitza esanguratsuak lortu zituen bertan. Aitziber Alonso txapeldunorde geratu zen eta klubak hirugarren postua erdietsi zuen taldekako sailkapenean.
Urko Herrerok ere bazuen lehiaketan parte hartzeko asmoa, baina ezin izan zuen, unibertsitateko azterketak zituelako. “Faltan bota genuen norgehiagokan, bera eta Aitziber taldeko bi zutoin indartsu dira eta”, azaldu du Olga Gutierrezek.
Europara begira
Klubeko kideak nabarmendu du aurtengoa “urte gogorra” izan dela. Hori dela eta, atsedena hartzeko tarte bat hartuko dute ekainean klubeko kideek, uztailean txapelketa garrantzitsu bat izango baitute: Nafarroako Opena. Proba hori Espainiako sailkapenerako puntuagarria da. “Sailkapen horretan sartzea eta, modu horretan, Europako Txapelketara joatea da gure asmoa”, azaldu du Gutierrezek.
Bihar -ekainak 2-, aldiz, oso bestelako zita bat izango dute Laudioko kiroldegian, eskola-jardunaldi bat eskainiko baitute.
