Gasteizko Merkataritza Arloko 1. Epaitegiak erabaki du Sagona Industrial taldearen eskaintza dela onena eta, ondorioz, bere esku geratuko da Gometegui enpresa.
Zehazki, Sagonak 300.000 euroko ekarpena egingo dio hartzekodunen konkurtsoari. Hori ez ezik, Gizarte Segurantzarekin dagoen 502.540,82 euroko zorra ere bere gain hartuko du -hori bai, 5 urte barru ordainduko du-, eta kreditu konkurtsalerako 209.419 euro emango ditu.
Langileei zor zaien 244.396 euro kitatuko ditu eta bestelako kredituei aurre egiteko -Banco Popularrarena, besteak beste- 800.000 euro baliatuko ditu. Gometegui enpresa 8.715.959,26 eurotan baloratu zuten prozesua hasi zenean.
Beste eskaintzak
Epaileak jakinarazi du beste hiru interesdun egon direla: Duma Investement, Gometegui Advance eta Alosan Gestión SL. Hori bai, azken fasera Gometegui Advance eta Sagona baino ez da iritsi. Edonola ere, epailearen ustez, Gometegui Advancen proposamena ez da izan nahikoa, eta eskaintza hori bakarrik egon izan balitz, ez luke oniritzia emango salmenta egikaritzeko, enpresa horrek ez baitzuen hainbat zorren ardura hartu nahi.
26 langile kalera
Erosketa gertatu den arte, ordea, bidea ez da xamurra izan Gometegui lantegian. Azken urteetan gertatu diren lan gatazkei gehitu behar zaio maiatzean 26 langile kaleratu zituztela.
Gasteizen finkatuta dagoen taldearen eskaintza onartu du Merkataritza Arloko Epaitegiak. Besteak beste, 53 langileen jarraipena bermatuko duela adierazi du epaileak.
Erlazionatuak
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide