Ekitaldi jendetsua egin zuen EH Bilduk atzo Laudioko Lamuza parkeko Kasinoan, datorren urteko maiatzeko udal-hauteskundeetarako alkategaia aurkezteko. Natxo Urkixo izango da alderdi subiranistaren zerrendaburua. “Ez zen nire asmoa berriro aurkeztea”, azaldu zuen Laudioko alkateak ekitaldian, “baina, hainbat faktore medio, berriro egokituko zait zuen laguntzarekin maiatzeko udal-hauteskundeen ostean berriro alkate izatea”. Urkixok nabarmendu zuen horrela erabakiek eragina daukatela norberaren bizitza pertsonalean. Gauzak hala, barkamenak eskatu nahi izan zizkien “familia eta lagunei”.
Talde-lana
EH Bildurena “erronka kolektiboa” dela nabarmendu zuen alkateak. “Niri egokitu zait EH Bilduren irudia izatea, baina talde bat gara, eta taldean egiten dugu lan. Motxila handia da gurea, baina sendoa. Handia izan arren arina ere bada, gustura eramaten den horietakoa. EH Bilduren motxila horretan badago espazioa datozen lau, zortzi edo hamabi urtetarako”.
Ekarpenen zain
Urkixoren hitzetan, lan-taldea osatzeari ekingo diote, “2019ko maiatzetik aurrera udala gobernatzen jarraitzeko”. Jendearen “ekarpenak eta babesa” behar dituztela nabarmendu zuen alkateak, “Laudioar guztiak baikara Laudio eraldatzen jarraitzeko berme bakarra”.
Natxo Urkixoz gain, Maddalen Iriarte legebiltzarkideak eta Kike Fernandez Pinedo Arabako Ahaldun Nagusirako hautagaiak hartu zuten hitza ekitaldian.
(1)_tokikom_735x413.jpg)
