aiaraldea.eus

JEZeko langileak amiantoarekin kontaktuan egon direla adierazi du ASVIAMIE Aiaraldeak

Erabiltzailearen aurpegia Txabi Alvarado Bañares   Jendartea  Laudio

Elkarteko kideek nabarmendu dute JEZeko langile ohi batek amiantoarekin erlazionatutako gaixotasun bat izan zuela.

JEZeko langileak amiantoarekin kontaktuan egon direla adierazi du ASVIAMIE Aiaraldeak
JEZen lantegiko labe bat. | Ikusi handiago | Argazki originala

JEZek plazaratutako oharrari erantzun dio ASVIAMIE Aiaraldeak. Laudioko enpresak adierazi zuen bere lantegian beharginek ez dutela amiantoarekin lan egin, bere azpiegituretan mineral kutsagarri hori egon dela aitortu arren. Horren aurrean, ASVIAMIEko kideek adierazi dute “eztabaidaezina” dela Aiaraldeko enpresa askotako ekoizpen labeetan amiantoaren presentzia "arrealitate bat" dela.

Horrez gain, elkarteko kideek nabarmendu dute JEZeko langile ohi batek amiantoarekin erlazionatutako gaixotasun bat izan zuela. “Hala baieztatu digu bere senide batek, eta beste langile batzuek ere fabrikan mineral hori zegoela adierazi zuten duela zenbait urte”.

Amiantoaren biktimen elkarteko kideek azaldu dute 2002. urtean debekatu zela amiantoaren erabilera. “Material horren iraupena 10-40 urte bitartekoa da, kasu batzuetan handiagoa edo txikiagoa den arren”. Era berean, ASVIAMIEko kideek ohartarazi dute mineral horren fibra bakar bat nahikoa izan daitekeela heriotza eragiteko. “Hala diote azken ikerketa zientifikoek”, azpimarratu dute.

Hurrengo zita, urtarrilaren 10ean
Eragile berria da ASVIAMIE Aiaraldea. Duela hilabete sortu zen eta abendua hasieran egin zuten taldearen aurkezpena. Datorren urtarrilaren 10ean Laudioko udal erabilera anitzeko aretoan egongo dira elkarteko kideak, 18:00etatik 20:00etara. Amiantoarekin kontaktuan egon diren pertsonei luzatu diete bertaratzeko gonbita, aholkularitza zerbitzua jaso dezaten. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa