Prentsa oharra plazaratu du PSE-EEk LIDLen biltegia Laudiotik Langraitz Okara mugituko dutenaren albistea dela eta.
Juanje Merchanen ustez, deslokalizazioa albiste txarra da udalerriarentzat, “langileentzako, enpleguarentzat zein Laudiok gune industrial eta enplegu sortzaile gisa duen irudiarentzat”. Merchanen aburuz, egoerak EH Bilduk arazoei aurre egiteko duen “gaitasun eza” jartzen du agerian.
Gauzak hala, PSE-EEren alkategaiak ziurtatu du bere alderdiaren helburua izango dela Laudio “inbertsioetarako eta enplegua sortzeko gune erakargarria” bilakatzea.
EH Bilduren udal gobernuak, bere aldetik, jakinarazi du enpresarekin bildu diren okasio guztietan ziurtatu dietela ez zutela Laudioko biltegia itxiko. "Hala ere, norbaitek azalpenak eman behar baditu, hori PSE-EE da, eurak baitaude Arabako Foru Aldundian gobernatzen", salatu du Jon Ander Altubek, "izan ere, hedabideek zabaldutako informazioaren arabera, Aldundiaren menpe dagoen Garapen Agentziaren lursail batean eraikiko du LIDLek biltegi berria".
