Gaur eguerdian egin du publiko Omnia alderdiak Aitor Anchia izango dela lehena bere zerrendan Arabako Foru Hauteskundeetan. Miguel Angel Villanuevak, Sonia Barbarak, Soraya Moralek eta Roberto Ariasek osatuko dute taldea.
Alvaro Barrios Omniako kideak ziurtatu duenez, helburua bi 2 batzarkide lortzea izango da, baina bakarra eskuratuta ere, akordioak gauzatzeko giltza bilakatzea nahi dute, "bitartekoak eta inbertsioak Laudiora erakartzeko."
Aitor Anchia alderdi independenteko zinegotzia izan da azken 4 urteetan eta bere kideen konfiantza dauka. Anchiak berak azaldu duenez, "nire xedea da Laudioko ahotsa Batzar Nagusietara eramatea. Herriak ez dauka ordezkapenik erakunde horretan Gasteizek agintzen duelako Araban, eta alderdi handiek ez diotelako erreparatzen gainerako udalerriei."
Omniako kideek azpimarratu dute Arabako alderdiek ez dutela ezer egiten Laudioren alde. Zenbait adibide jarri dituzte argudiatzeko, balizko eskualdeko ospitalea edo ongizate zerbitzuen mapa, besteak beste. Euren ustez, herritarrek ordaintzen dituzten zergak Gasteizen garapenera bideratzen dira, Laudion bertan islatu ordez.
Gainerako alderdi independenteen babesa
Alvaro Barriosek argitu du Omniako kideek soilik osatzen dutela zerrenda, eta euren proiektua dela Foru Hauteskundeetan parte hartzea. Hala ere, Aiara Batuz, Okondo Aurrera eta Amurrio Guk Bai alderdiekin partekatu dute egitasmoa eta euren oniritzia jaso dute.