Juantxo Lopez Uralde eta Miren Gorrotxategi Kongresurako hautagaiak eta Pilar Garrido eta Kontxi Palencia Senatuko zerrenda kideak ekarri zituen atzo Elkarrekin Podemos koalizioak Laudiora.
Miguel Burdallo alkategaiak ireki zuen ekitaldia eta bere kideei eman zien hitza. Gainerako Elkarrekin Podemoseko ordezkariek hiru ardatzetan oinarritu zuten euren diskurtsoa: ekologia, sektore eta alderdi eskuindarren kritika eta hauteskunde proposamenak.
Elkarrekin Podemoseko kideek gogor salatu zituzten PP, Ciudadanos eta Vox; "garai ilunetara" itzuli nahi dutelako politikoki. Horrez gain, PPren politika xahutzaile eta ustelak ere nabarmendu zituzten.
Hala ere, kritika gehien jaso zuen alderdia EAJ izan zen. Hautagai guztiek jaso zituzten aurreko egunean Andoni Ortuzarrek egindako adierazpenak -Podemosek ez duela euskal herritarrak ordezkatzen esan zuen- eta gogor jo zuten jeltzaleen aurka.
Koalizio ezkertiarreko kideek "4. eskuina" deitu zioten EAJri eta behin eta berriro leporatu zioten industria politikak ez egitea eta porlanaren interesak defendatzea Madrilen, euskal herritarren eskubideak zaindu ordez.
Horren aurrean, Elkarrekin Podemosek lana sortzeko politika berdeak aldarrikatu zituen, bai industrian auto elektrikoa bultzatzeko eta baita ingurugiro alorrean ere, Nerbioiko saneamendua aipatuta.
Koalizioko politikariek nabarmendu zuten eurek euskal herritarren eskubideak sustatzen dituztela Kongresuan eta gogoratu zuten 900 euroko gutxieneko soldata euren lorpena dela, besteak beste. Horrez gain, eutanasiaren lege proposamena ere aipatu zuten.
Bukatzeko, azpimarratu zuten Elkarrekin Podemosen aldeko boza eraginkorra eta baliagarria dela, PSOE eta Ciudadanos alderdien gobernua "Ibex 35"-ren gobernua izango litzateke eta.