aiaraldea.eus

Udalaren berregituraketa proposatu du Omniak

Erabiltzailearen aurpegia Izar Mendiguren Cosgaya   Politika  Laudio

Udalaren antolaketa berritu nahi dute, "Laudio martxan jartzeko". Herri programan 142 proposamen bildu dituzte horretarako, prentsa oharrean azaldu dutenez. 

Udalaren berregituraketa proposatu du Omniak
Foru hauteskundeetara aurkeztuko direla iragartzeko eskainitako prentsaurrekoa. / Aiaraldea | Ikusi handiago | Argazki originala

Laudioarren 800 ekarpenetatik osatu du Omniak hauteskundeetarako herri programa. Auzo batzarrak, "parte hartzerako puntuak"... baliatu dituzte horretarako. Omniakoek adierazi dutenez, hiru bloketan bereizi nahi dute Udala: lurraldea, antolaketa eta herritartasuna, "udal baliabideak optimizatzeko". 

Hala, antolaketaren barruan udalaren barne kudeaketa izango dute ardatz. Herritartasunaren alorrean, berriz, euskara, kirolak, kultura, euskara, ingurunea eta animaliak txertatu nahi dituzte, besteak beste. Lurraldeari dagokionez, mugikortasuna, energia, zaborren kudeaketa eta abar landuko dituzte.

Aurreratu dutenez, udaletxeko langileen funtzio eta beharrak aztertuko dituzte, "datozen urteetan izango diren erretiroak aintzat hartuta". Horretarako OPEa iragarri dute -enplegu publikorako azterketa-,  langileria gaztetze aldera. Tokiko garapen agentziaren bidez aholkularitzan eta diru-laguntzetan sakonduko dute.

"Garrantzitsua da tokiko komertzioaren alde apustu egitea, edota baloreen ponentzia berria". Zergen harira, OHZ Foru Aldundiarekin negoziatzeko konpromisoa hartu dute: "Laudion dagokiguna baino gehiago ari gara ordaintzen eta".

Laudio eskualdeko burua izaten jarraitzeko, turismo lokalari helduko diote: aisialdiari, gastronomiari, ostalaritzari, ondareari, naturari eta tradizioari. "Guzti hori Aiarako Kuadrillako eskualdeko turismoa sustatzeko proiektuekin batera egingo dugu". Hauteskunde kanpainari buruzko jarraipena eta herri programa 2019.omnialaudio.com webgunean kontsulta liteke.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa