aiaraldea.eus

“Omniaren esentzia” aldarrikatu dute hauteskunde kanpainaren amaierako jaian

Erabiltzailearen aurpegia Txabi Alvarado Bañares   Politika  Laudio
“Omniaren esentzia” aldarrikatu dute hauteskunde kanpainaren amaierako jaian

Gaur iluntzean egin du Omniak kanpaina amaierako jaia, Aldai plazan. Ez-ohiko ekitaldia izan da, ez baitu hitzartze luzerik izan. Musikak eta umoreak hartu dute diskurtsoen lekukoa, herriko hainbat sortzaileren eskutik.

Iñaki Moskoso arduratu da alderdi laudioarraren aurkezpena egiteaz, umorea eta abestiak tartekatu dituen bakarrizketa baten bidez.

Nerea Gonzalez igo da gero oholtzara. Omniako zinegotziak aldarrikatu du alderdi laudioarraren unea heldu dela. “Guztiok eman behar dugu bultzada herri hau eraldatu ahal izateko. Batzuk ikusezin bilakatu nahi gaituzte, baina ahaztu egiten zaie loratu egingo diren haziak”.

Alvaro Barrios izan da hitza hartzen azkena. Alkategaiak Omnia osatzen duten pertsonengan jarri du fokua. Eskerrak eman dizkie azken lau urteetan Omnian militatzen aritu diren pertsonei, eta eginiko hauteskunde-kanpaina jarri du balioan: “Aurreko batean beste talde politiko bateko kide batek esan zidan diru asko gastatzen genuela propagandan. Baina egin dugun guztia gure kabuz egin dugu, eskuz, beste alderdi guztiak uneoro telebistan agertzen ziren bitartean”.

Horrez gain, ohartarazpen bat bota die Barriosek plazan bildutakoei: “Alkate izango naizenean egon ziur huts egingo dudala batzuetan, baina ez dut nahita huts egingo”. Euren hiru printzipioak nabarmendu ditu alkategaiak: Zintzotasuna, kalitatea eta esentzia. “Politika egiten duen auzokide talde bat gara, ez alderdi bat”.

Ikusi argazki guztiak handiago

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa