Polemika eragin du Juan Ibarrola Oruetaren biografiaren aurkezpenak. Urtarrilaren 31n aurkeztu zen liburua Laudioko Kasinoan, Erroke Deuna Kofradiaren eskutik. Hainbat pertsonek hartu zuten hitza bertan, Kepa Barañano tartean.
Idazle laudioarraren hitzak dira, hain zuzen, zeresana sortu dutenak. Honako hau esan zuen Barañanok Kasinoan, besteak beste: “Orain, nazismoa, faxismoa eta frankismoa, hirurak berdinak baitira, ostera ere, Europari, Espainiari, Kataluniari, Euskal Herriari... Mehatxatzen, zemaika ari zaizkigunean, guk ozen eta zuzen, Ibarrolaren kirmentasunaz eta lehendakariaren hitzak hartuz erauntsi behar diegu”.
Erreakzioak berehalakoak izan ziren. Ekitaldira bertaratu ziren guardia zibil batzuk aretotik alde egin zuten, idazle laudioarrak baieztatu duenez. Kofradiako kideek, euren aldetik, oharra plazaratu dute Barañanok esandakoak konpartitzen ez dituztela adierazteko.
Zahazki, hurrengoa adierazi du kofradiak: “Gure harridurarako, hitzartzea ez zen ezarritako printzipioen araberakoa izan. Laudioko baserri bateko gazte batek duela mende bat bizitakoen kontakizunaren balio antropologikoaren eta itzulpen lanaren deskripzio eta balorazioa izan behar zuena mitin bilakatu zen, zeinaren unea, tonua eta edukia konpartitzen ez dugun”.
Gauzak hala, “irainduak” sentitu ahal izan ziren pertsonei barkamenak eskatu nahi izan dizkie kofradiak, eta halakorik berriro ez gertatzeko neurriak hartuko dituztela ziurtatu dute.
Kepa Barañanok, bere aldetik, ekitaldian esandakoen transkripzio osoa helarazi dio Aiaraldea hedabideari. Hemen azpian irakurri daiteke (horiz markatuak dauden zatiak ez ziren plazaratu, denbora faltagatik). Horrez gain, gaiari buruzko iritzi zutabea plazaratu du idazle laudioarrak, hemen irakurri daitekeena.
Laudio Memoria elkarteak, aldiz, gertatutakoa konponduta dagoela adierazi du: "Anaidiak eta Kepak hitz egin dute eta arazoa konponduta dago".