Txakur batek hainbat ardi hil eta beste batzuk zauritu zituen asteburuan Laudion, Larrazabal auzoan. Larunbatean topatu zituzten jabeek animaliak, goizeko hamaikak aldera. “Txakur batek erasotu zituela uste dugu, dituzten haginkaden formengatik, baina ez dakigu ziur txakur bakarra izan zen edo bat baino gehiagoren artean egin zuten”, azaldu diote Aiaraldea Hedabideari.
Erasoa “oso bortitza” izan zela nabarmendu dute, “zauritutako ardietako bat atzo hil zen, zaurien ondorioz”.
Gauzak hala, txakurrekin kontuz ibiltzeko mezua luzatu diete animalia horiek dituzten pertsonei. “Badakigu ez direla txarrak, baina batzuei burua joaten zaie ardiak ikusten dituztenean”.
Bi eraso jazo dira asteburuan ardien kontra. Bat Okondon eta beste Laudion. Ertzaintzak ez daki harremana duten, baina ez du aukera hori baztertzen.
Honakoa ez da eskualdean gertatzen den mota honetako lehen kasua. Gorbeiako artzainek eta Orozkoko Udalak, adibidez, hainbat kasu salatu dituzte azken urteetan.
Beste eraso bat Okondo aurreko egunean
Ertzaintzak azaldu dio Aiaraldea Hedabideari Laudioko ez dela azken egunotan jazo den eraso bakarra. Izan ere, aurreko egunean, hau da, ostiralean 4 ardi hil zituzten eta beste 4 zauritu Okondoko Irabien auzoan.
Poliziak ez du zehaztu harremana dagoen bi gertakarien artean, baina ez du baztertu.
![[IRITZIA] Ardiak babesik gabe](https://aiaraldea.tok-md.com/argazkiak/CIw/cache/98_8%20JESUS%20ANGEL%20ZALO_tokikom_735x413.jpg)
![[IRITZIA] Txakurrak mendian](https://aiaraldea.tok-md.com/argazkiak/aVQ/cache/98_8%20iritzia%201_tokikom_735x413.jpg)
