Atseden gutxi hartu dute Laudioko Kirikiño taldeko kideek uda garaian. Koronabirusaren ondorioz, auzoetako jaiak zein tailerrak bertan behera geratu dira. Alabaina, horrek ez die proiektua geldiarazi, eta bestelako dinamikak abiatu dituzte.
Baratzea da horietako bat: "Abuztua, uztailaren amaierarekin batera, hilabete beroa izaten ari da baratzerako", adierazi dute. Abuztuaren 9an eta 23an egin zituzten auzolanak eremua eta jakiak zaindu zein hazteko.
Webgunean udako errezetak, eskulanak, gomendioak zein esperimentuak jarri dituzte eskura, besteak beste
Udaberrian ekin zioten gunea atontzeari, eta dagoeneko letxugak, piperrak, marrubiak zein patatak jaso dituzte lantaldeko kideek, besteak beste.
Uztaileko eta abuztuko uzta ikus-entzunezkoan bildu dute, Youtubeko kanalean:
Udako errezetak eta argazki lehiaketa
Ildo beretik, udako errezeten aldizkaria osatu dute. Issu plataforman topatu daiteke materiala, 22 orriko bilduma alegia. Falafela, hostopila, smoothieak edo bestelako jaki freskoak prestatzeko osagaiak eta modua pilatu dituzte aldizkarian.
Bestalde, argazki lehiaketa ere antolatu dute. Kirikiñoren webgunean ikusi daitezke orain arte aurkeztutako lanak, baita parte hartzeko nondik norako guztiak ere. Tailerrak, errezetak, proposamenak, ipuinak zein esperimentuak ere plazaratu dituzte atarian.
Horrez gain, ipuinak zabaldu dituzte bideoetan, "Non dago Txirlo?" istorioa kasu: