Laudioko EAJk oharra atera du jaien inguruko kudeaketa argitzeko. Kartel lehiaketari dagokionez, "jaiak" hitza kentzearen arrazoia aipatu dute: "Lehiaketa hori ez zen egin sanrokeak iragartzeko, baizik eta izpiritua eta ilusioa bizirik mantentzeko". EAJren aburuz, oposizioko alderdiei ondo iruditu zitzaien proposamena, baita saria eskudirutan eman ordez tokiko dendetan kontsumitzeko bonua izatea ere.
Pregoiaren ekitaldiari buruz, berriz, "herriari egindako aitortza zela" gogoratu dute, "bere portaeragatik". "Ateak itxita egindako pregoi pribatua" zela kritikatu zuten Omniak eta EH Bilduk. EAJk horrela erantzun die: "Pregoilari izena eman zitzaion laudioarrentzat hori delako ohore handiena.
Dirudienez, Urteko Llodiano edo Laranja Saria deitu izan baliote, gusturago geratuko ziratekeen". Jeltzaleen hitzetan, korporazio osoa zegoen deituta ekitaldira: "EAJ eta PSE-EEren gobernu taldeari gehiago gustatuko litzaiguke ekitaldi publiko jendetsua egitea, baina zentzuz eta erantzukizunez jokatu behar zen".
EH Bilduk eginiko kritikei ere erantzun diete oharrean, tokiko erakundeak antolatutako ekitaldi puntualen harira: "Kontraesana da ekitaldirik egin behar ez zela esatea; eta elkarte-mugimenduek ekitaldiak antolatzea debekatu izana kritikatzea. EH Bilduko Laudioko buruzagien arabera, elkarte mugimenduak antolatzen baditu (gehienak ez zeuden prest) ekintzak egin behar dira, baina udalak egitekotan ez. Oso koherentea. Gainera, askotan galdetu dute ekitaldiei buruz, zein helbururekin? Ez egiteko esateko?".
Koronabirusak eragindako pandemia dela-eta, "EAJk ez du kristalezko bolarik bitxoak nola jokatuko duen jakiteko. EH Bilduk bazekien, berandu aritu ginela esaten zutenean. Kritikatzea erraza da, eta oso ondo ematen zaie, baina arazoak kudeatzea eta konpontzea ez hainbeste, EH Bilduk azken 8 urteetan Laudioko Udalean egindako kudeaketa kaotiko eta desantolatuarekin ikusi ahal izan den bezala".
Parte hartze eredua oinarri
Bestalde, oposizioak leporatutako parte hartze eza izan dute hizpide jeltzaleek oharrean. EAJk defendatu duenez, azken 14 hilabeteetan parte hartze prozesu ugari egin dira: aurrekontu parte hartzaileak, auzo zinegotzien figura, herritarren inkestak edota kultur zein jai eragileekin bilerak, kasu. "Laudioko egungo gobernu taldearen kudeaketa ez al da parte hartzailea?" galdegin dute, beraz.
Azkenik, penagarritzat jo dute EH Bildu eta Omnia kezkatuago egotea osasun krisian markatutako une zail hauetan udal taldearen neurri edo ekimen guztien kritika errazagatik herriarentzako konponbide eta ekimen eraginkorren ekarpenagatik baino. Horren adibidetzat jarri dituzte "nahita politizatutako prentsa oharren argitalpenak". Ildo beretik, alderdiak aurrez aurre jartzera animatu dituzte, "eta modu arduratsuan sorbalda gehiago jartzera, modu eraikitzailean eta gure bizilagun guztien onerako".