Antonio Aiz izendatu dute URA agentziako zuzendari. Politikari laudioarrak Ernesto Martínez de Cabredo ordezkatuko du kargu horretan. Zuzendari aldaketa hori oso lotua dago PSE-EE eta EAJk gobernua osatzeko egin dituzten negoziazioekin. Izan ere, Ingurumen Saila jeltzaleen esku egotera pasa da, aurreko legealdian sozialisten kontrolpean egon ostean.
Aizek ibilbide luzea eman du politikan eta kargu publikoetan. Laudioko alkatea izan zen 1991 eta 1997 urteen artean. Urte horretan kargua utzi behar izan zuen epaitegien aginduz, Herri Batasunako zinegotzi bati udalari buruzko informazio bat ukatzeagatik. 2005etik 2013ra Euskal Trenbide Sareko idazkari nagusia izan zen, eta ordutik hona Eusko Jaurlaritzako Garraio eta Azpiegitura sailburuordea izan da.
URAren erronkak eskualdean
URA agentziaren jardunak eragin handia du Aiaraldean, Nerbioi ibaiak goitik behera zeharkatzen baitu zonaldea. Gauzak hala, bere eskualdeari zuzenean eragiten dioten hainbat afera kudeatu beharko ditu Aizek legealdian zehar. Erronka nagusia Basaurbe eta Markixanako araztegien eraikuntza izango da, horren ardura zuzena Espainiako Gobernuak duen arren. Horrez gain, eskualdean azken urteetan jazo diren isurketen eta arrainen heriotzen afera ere Aizen eskumena izango da.