1,48 milioi euroko Kreditu Aldaketa Espedientea onartu zuen Laudioko Udalak iragan ostegunean eginiko Ezohiko Udal Osoko Bilkuran, talde politiko guztien aldeko botoarekin.
Hemen ikusi daiteke plenoa osorik:
Bi zatitan banatzen da Udal Gobernuak eginiko proposamena. Alde batetik, 995.293,6 euro baliatuko dituzte hainbat gastu orokor egiteko. Ellakuriko igerilekuetan egingo diren berrikuntza, ikastetxeetako obrak edota ekintzaileentzako diru-laguntzak sartzen dira atal honetan, besteak beste. Ermualdeko aparkalekua eraikitzeko, txakurrentzako guneak seinaleztatzeko edota ur-hornidura sarea konpontzeko diru-partidak ere daude.
Hemen ikusi daitezke diru kopuru guztiak:
490.000 euro inbertsioetara
Bestetik, 490.000 euro bideratuko dituzte hainbat inbertsio egitera. Lau partida barnebiltzen ditu plan horrek: Etxebarri baserria eraikitzen hasteko, birlandatzeak egiteko, pumptrack-skate pista eraikitzeko edota kiroldegiko kantxa berritzeko.
Lau proiektuak dira esanguratsuak. Etxebarri Baserria berritzea da Udal Gobernu Taldeak bere Legealdi Planean zehaztu zuen proiektu izarretako bat. Haurreskola eraiki nahi dute bertan. Pumptrack-skate pista eraikitzea, aldiz, herriko patinatzaileen aldarria izan da urte luzez. Kiroldegiko kantxa berritzea ere premiazkoa bilakatu da azken urteetan, orain dagoen zoruak arazo ugari sortu dituelako.