Amurrioko Aresketa Ikastolari lekukoa hartuta, 2020ko abenduan aurkeztu zuen ofizialki Laudio Ikastolak Araba Euskaraz Jaialdiaren edizio berria. “Zabal Bideak” lemapean. Pandemia egoerak sortutako egoerari aurre egiteko “ilusioz eta kemenez” aurkeztu zuten egitasmoa, eta COVID-19ari aurre egiteko ezarritako neurriei moldatuz joan dira unean une.
Jaialdiaren data ekainaren 20an finkatuta egon arren, lehenengo unetik azpimarratu zuten ikastolako kideek ez zutela Araba Euskaraz asteburu bakar batera mugatuko. Kontrara, ikasturte guztian zehar presente egon da, euskarari bide berriak zabalduz etengabe.
Otsailean antolatu zuten jaialdiaren barruko lehenengo ekitaldi kulturala: Bertsoak, dantza eta musika uztartuz Laudioko Granja kiroldegia goraino bete zuen Bakardadeak garaitu ez zituenak izeneko ikuskizunak. Geroztik, ekimen ugari egin dituzte Laudio Ikastola lagundu eta herria girotzeko helburuarekin.
Martxoaren 14an “10.000 kilometro baietz!” erronka jarri zuten mahaigainean. 1.500 pertsonek hartu dute parte euskararen aldeko egitasmoan, Zumalakarregi etorbideko punta batetik bestera 11.280 kilometro eginda guztira.
Ekimen bateratuak
Araba Euskaraz jaiari begirako egitasmoak ez ezik, Euskal Herriko beste ikastolekin elkarlanean hainbat jarduera burutu dituzte azken ikasturtean Laudio Ikastolako ikasle eta irakasleek.
“Ikastolak Herriari” lemapean horma irudiak egin dituzte, eta horietako bat Granja kiroldegiko eskaileretan dago ikusgai. Ikastolen aldeko jai desberdinak zeharkatzen ari den liburu ibiltariak ere geldialdia egingo du Laudion, eta Lizarra Ikastolak antolatutako Nafarroa Oinez jaialdia izango du helmuga.
Komiki lehiaketa ere antolatu dute eta Laudioko ikaslea den Jugatx Larrakoetxearen Amaiurko setioari buruzko lanak irabazi du lehen saria.