Egoitz Bernaola eta Angel Larreak jasoko dituzte San Roke Kofradiak urtero banatzen dituen pitzarrak. Abuztuaren 16an jasoko dute aitortza bi historialariek, 11:00etan Laudioko San Pedro elizan egingo den mezaren eta Andere abesbatzaren kontzertuaren ostean.
Modu horretan, bi laudioarrek eginiko lana goraipatu nahi du kofradiak, Joaquin Barbara y Balza margolariaren eta Juan Ibarrola Orueta militar errepublikarraren figurak ikertu baitituzte.
Ekimen gehiago labean
Igandean egin zuten San Roke kofradiak kide berriak onartzeko ekitaldia. “8 pertsona batu dira, 5 emakume eta 3 gizon. 433 kide gaude gaur egun”, zehaztu du Jose Luis Navarrok. Kofradia maiordomo nagusiak aurreratu duenez, ekimen gehiago dituzte prestatuta datozen hilabeteetarako, baina pandemiaren egoera hobetu arte itxaron nahi dute.
Alde batetik, Jose Ignacio Urquijo Valdivieso soziologo laudioarraren liburu berria plazaratu nahi dute. “Kofradiei buruzko lana osatu du, Laudioko adibide moduan hartuta”, azaldu du Navarrok, “izan ere, hemengo anaidiaren kasua nahiko ezohikoa da, erakunde erlijiosoa izan arren, bere jarduna sozio-kulturala delako gehienbat”.
Beste liburu bat ere dute prest, Igor Castillok idatzitakoa. “Laudioko jatorrizko abizenak ditu hizpide, 1560tik gaur egunerainoko erregistroak ikertuta. XV. mendean hasi ziren abizenak erregistratzen, Trentoko kontzilioaren ostean”.