"Itzalpeko emakumeak" erakusketa inauguratu zuen Laudioko Udalak iragan ostiralean Lamuza parkean. Sabino Arana fundazioak atondu du esposaketa eta otsailean jarri zuten ikusgai lehenbiziko aldiz, Tolosan. Bigarren geltokia izango da Laudio.
Bi ildo nagusi ditu erakusketak: memoria historikoa eta emakumeak. Hain zuzen, "euskal emakumeek Gerra Zibilean eta gerraostean jasandako abusuak eta indarkeria" ezagutzera ematea da proiektuaren xede nagusia.
Dozenaka herritar bertaratu ziren Kasinoan eginiko inagurazio ekitaldira, eta hainbat ordezkari instituzionalek hartu zuten hitza bertan: Ander Añibarro (Laudioko Alkatea), Beatriz Artolazabal (Berdintasun, Justizia eta Gizarte Politiketako sailburua), Mireia Zarate (Sabino Arana Fundazioko presidentea) eta Ainhoa Campo (Berdintasunaren eta Giza Eskubideen zuzendaria Arabako Foru Aldundian).
Aiaraldeko emakumeen bizitzak
Erakusketa bi zatitan banatuta dago, baina Kasinoaren terrazan kokatutakoa da deigarriena, aiaraldearrentzat behintzat. Eskualdeko 9 emakumeren bizitzen nondik norakoak plazaratu dituzte bertan. Hauek dira emakume horiek:
- Angelica Orue Zubiaur
- Micaela Portilla
- Gregoria Martin Ibarra
- Salutxu Etxebarria Garay
- Francisca Urcelay Astobiza (Patxa)
- Maria Antonia Martinez Aldaiturriaga
- Sor Teodora Errazti Salaberria
- Pilar Isusi Monasterio
- Patricia Bilbao Uzkanga
Bisita gidatu hunkigarria egin zuten inagurazioaren ostean Kasinoko terrazan barrena. Aipatutako emakumeen lagun eta senide ugari bertaratu ziren ekitaldira, eta eurekin bizitako anekdota ugari partekatu zituzten gainontzeko herritarrekin.
"Belaunaldien arteko zubiak" eraikitzea da erakusketaren zati honen xedea. Udaleko kideek azaldu dutenez. "Proiektua gure gizartea osatzen duten belaunaldiak hurbiltzeko bidea izango litzateke", adierazi du Loli Muriel Berdintasun zinegotziak. Maite Cortazar Kultura zinegotziak, bere aldetik, nabarmendu du erakusketa "lagungarria" izango dela "egungo errealitatea interpretatzeko, memoria historikoa berreskuratzeko eta bizikidetzatik eta berdintasunetik abiatuta etorkizuna eraikitzeko".
Hala azaldu zituen erakusketaren nondik norakoak Maite Cortazar Kultura zinegotziak:
Kultur Etxeko gunea
Kultur Etxean dagoen gunean, aldiz, testuinguru orokorra izan dute hizpide. Euskal Herriko hainbat emakume erreferenteren bizitzak gogora ekartzeaz gain, Guda Zibilean eta gerraostean bizitakoak lantzen dira erakusketaren zati horretan, hainbat argazki, lekukotza eta objetu zaharren bidez.
Erakusketa astelehentik ostiralera bitartean egongo da ikusgai, Kultur Etxeko ohiko ordutegian, azaroaren 10era arte.