Azaroaren 11n, La Milagrosa Ikastetxeko DBHko hirugarren mailako ikasleek uraren eta ornogabeen laginak hartu zituzten ibaiaren bi eremutan, Gardean eta Aretan. Lagin horiek hezkuntza zentroko laborategietan aztertu zituzten eta emaitzak ez ziren bereziki positiboak izan.
Alde batetik, Areta aldean jasotako ur-laginetan, zehazki, Nerbioi ibaiak Altube ibaiarekin bat egin aurretik, bakterio koliforme gehiegi atzeman dituzte. Hondakin beltzen adierazle argiak dira horiek. Ondorioz, ez da edateko eta bainatzeko ur egokia.
Horrez gain, bi laginketa-eremuetan, fosfatoen kopurua 4ppm-koa da (miligramo/litro = miloi bakoitzeko zatiak). Balio egokiak 1 ppm-tik beherakoak izan beharko lirateke, eta horrek erakusten du ura kalitate txarrekoa dela.
Gainera, uraren oxigeno-saturazioaren emaitzak, bi eremuetan, % 30etik beherakoak dira, balioa % 90ekoa izan ordez. Horrek larriki zailtzen du uretan bioaniztasuna garatzea.
Ur beltzak Nerbioi ibaian
Herritarren artean eskualdeko industriaren kontrako susmoa oso zabalduta dago Nerbioi ibaiaren egoerari buruz, baina gutxiago erreparatzen zaio etxebitzen jokaerari, ibaiari eta errekei dagokienez.
Aiaraldea Komunikabideak bi laudioarren salaketak jaso ditu azken urteotan, zeinetan amorrua adierazi duten zenbait komunitatetan izandako eztabaidei buruz ur beltzen kudeaketen esparruan. Izan ere, Landaluze eta Latiorroko bi eraikinetan eztabaidatu zen zer egin hondakin horiekin.
(Putzu septikoan egindako bypassaren argazkia)
Bi kasu horietan, auzokideek mahai gainean jarri zuten ur beltzak desbideratzeko aukera euri-urak husteko sare publikora, bypass bat egikarituta putzu septikotik. Landaluzen auzokideek aukera hori alboratu zuten- Latiorron, ordea, aurrera egin zuen ideiak.
Hain zuzen, urteak daramatza eraikin horrek ur beltzak ibaira botatzen. Modu horretan, putzu septikoa husteko eta hondakinak tratatzeko gastuak aurrezten dituzte.
Egoera konpontzeko beharra
Aintzat hartuta Basaurbeko araztegiaren proiektua gero eta aurreratuagoa dagoela, horrelako egoerak konpontzeko premia handia izango du eskualdeak eta erakundeen ardura da hori. Izan daiteke Latiorroko kasua bakarra izatea, baina Laudioko ibaiak eta errekek erakusten duten usaina eta itxura iradokitzen dute ez dela egoera isolatua.
Zentzu horretan, La Milagrosa Ikastetxeko gazteen ondorioa argia izan da, are gehiago alderatuta duela hiru egin ziren laginketa eta analisiekin: "Hiru urte pasatu dira lehenengo azterketa egin genuenetik. Esan dezakegu ez dela ezer aldatu eta ez dela ezer egin gure ibaiko zauriak sendatzeko".