Capital Energy enpresak 200 metroko aerosorgailuak jarri nahi ditu Jesuri mendian, Orozko, Laudio eta Amurrio artean. 2010ean ireki zen proiektua aurrenekoz. Garai hartan, Guascor S.A. enpresak 8 aerosorgailu jarri nahi zituen energia elektrikoa sortzeko. Egitasmoak ez zuen aurrera egin baina Eusko Jaurlaritzak onartutako legeek aukera berri bat jarri dute mahai-gainean. Gainera, Gorobelen beste bi parke eoliko eraiki nahi ditu Gaztela Leongo gobernuak.
Gaiarekin interesa duten eskualdeko herritarrak eta kolektiboak biltzeko asanblada ireki bat egitea proposatu dute; eta datorren asteetan emango dute hitzorduaren berri
Antolatzeko unea
Parke eoliko guzti horiek eskualdean eragin dezaketen kalteak kezka sortu du herritarren artean. Hainbat ekimen eta solasaldi egin dira gaia lantzeko, Orozkon eta Aiaran, besteak beste. Gaur bertan eskaini dute gaia lantzeko hitzaldia Arabako Mendiak Aske plataformako kideek. Laudioko Kultur Etxeko Arraño gelan egin dute solasaldia eta herritar asko bertaratu dira.
Gogoratu dute 2010ean herritarren presioak eta mobilizazioak gelditu zituela Jesuri eta Ganekogorta mendietan eraiki nahi zituzten parke eolikoak. Orduko hartan Aiaraldeko udalek ere aho batez arbuiatu zituzten proiektuak. Bide horretan, gaiarekin interesa duten eskualdeko herritarrak eta kolektiboak biltzeko asanblada ireki bat egitea proposatu dute. Datorren asteetan emango dute hitzorduaren berri.
Aerosorgailuak Gorobelen
Gaztela Leongo Gobernuak 100 metroko aerosorgailuak jarri nahi ditu Gorobel mendilerroan, Aiaraldeko natur ingurunean. Hain zuzen ere, bi dira bertan aurreikusita dauden proiektuak: 'Pico del Fraile' eta 'Llorengoz'. Lehenengoak, 'Pico del Fraile'-k, 10 aerosorgailu izango lituzke Angulo mendatetik hasita Carbonilla mendilerroan barrena, Artziniega gainean, hain zuzen. Aldiz, Llorengoz parke eolikoan, Gaztela eta Leon eta Arabaren arteko muga jarraituz, 11 aerosorgailu jartzea aurreikusi dute, Tologorri, Mojon Alto eta Kobata inguruan.
Gaztela eta Leon eta Arabaren arteko muga jarraituz, 11 aerosorgailu jartzea aurreikusi dute, Tologorri, Mojon Alto eta Kobata inguruan.
Gaztela Leongo Gobernuak 2020ko apirilean aurkeztu zuen proiektua autonomia erkidegoko aldizkari ofizialean. 50 megawatt baino potentzia handiagoko aerosorgailuak dituzten parke eolikoak Industria eta Energia Ministerioaren menpe daude. Aldiz, Gorobelen eraiki nahi dituzten parkeek potentzia baxuagoko aerosorgailuak izango dituzte eta, ondorioz, hain zorrotzak ez diren administrazio organoetatik igaro behar dira, proiektuaren ingurumen-inpaktua handituz.
Gorobeleko mendilerroa, gainera, hegaztien babes berezirako eremu (BBE) izendatuta dago. Aurkeztutako proiektuetan aerosorgailu bakar bat ere ez dago babestutako eremu natural baten barruan proiektatuta, bai ordea horrelako eremuetatik metro eskasera, ingurune natural horiek kaltetuz halabeharrez.
