Laudioko herriguneko zenbait negoziok salatu dute kristalak hautsi dizkietela azken hilabeteetan. Apurketa izan duen azken denda izan da Gloss. Zumalakarregi etorbideko establezimenduko jabeak Aiaraldea Komunikabideari azaldu dionez, Inauterietan gertatu zen. Adierazitakoaren arabera, ekintza kaleko bideokamarek grabatu zuten eta irudietan ikusten da gizon gazte bat beira apurtzen.
Dirudienez, Ertzaintzak ekin dio grabaketa aztertzeari, baina dendako jabeari aipatu diote irudiak ez direla oso argiak eta ez dakitela egilea identifikatzeko gai izango ote diren.
Kristal gehiago hautsita herrigunean
Merkataritza eta zerbitzu negozio gehiagok izan dituzte horrelako arazoak azken hilabeteetan. Zentzu horretan, Entre Alfileresen antzeko gauza gertatu zen. Ibaizabal kaleko dendako arduradunak alde bateko beira topatu zuen txikituta azaroan. Emakumezkoa harrituta geratu zen, kristala blindatua zelako: "Metalezko tresnaren batekin jo behar izan zioten, ez baita hain erraz apurtzen".
Inauterietan apurtu zuten Gloss dendako kristala eta Entre Alfileres eta Rivera botikakoa azaroan eta abenduan.
Jabeak kontatu du Udaltzaingoan jarri zuela salaketa, baina ez duela berririk izan gertatutakoari buruz. Dendariak azpimarratu du erasoa garesti atera zitzaiola: "3.000 euroko balioa dauka kristala eta binilozko errotulazioa aldatzeak".
Entre Alfileresetik oso hurbil dago, metro eskas batzuetara, Rivera botika. Eurek ere kristal bat aldatu behar izan zuten, norbaitek apurtu ostean. "Ez ginen konturatu, ertz batean baitzegoen kaltea, baina bezero batek jakinarazi zigun. Abenduan konturatu ginen, ez dakit noiz egin zuten zehazki. Aseguruarekin harremanetan jarri ginen eta berehala aldatu ziguten", argitu dio jabeak Aiaraldea Komunikabideari.
Hedabidea harremanetan jarri da APILL elkartearekin, jakiteko horrelako egoerak errepikatu diren, baina tokiko merkatariak, ostalariak eta enpresa txikiak batzen dituen eragileak ez zekien ezer horri buruz. "Elkarteko kideak ez badira, ez zaigu berririk heltzen, eta kasu hauetan ez dira gure bazkideak" zehaztu du elkarteko gerentea den Claudio Perezek.
Ekintza bandalikoak azken hilabeteetan
Dendariek testuinguru zabalagoa aipatu dute euren kasuak kokatzeko orduan, eta gogoratu dute horrelako portaerak ez dira isolatuak izan 2021ean eta 2022an. Hain zuzen, burura ekarri dute Arraño eta herrigunea lotzen duen igogailuaren egoera edota Kasinoko atearen apurketa.