Costa Ricara bidaiatu zenuen otsailean. Zein da bidaiaren xedea?
Costa Ricako Universidad Nacionalera etorri naiz lanari esker formakuntza bat jasotzera satelite bidezko teledetekzioan. Unibertsitatean ikerlari talde bat dago satelite bidezko irudiak erabiltzen dituena herrialdeko ekosistema eta nekazaritzaren kudeaketan laguntzeko. Nire helburu nagusia haiek erabiltzen dituzten teknika eta programa informatikoak ikastea da, gero Euskal Herrian aplikatzeko.
Unibertsitatean ari zara ikerketan; zein da zure lana?
Lana zati ezberdinetan zatituta dago. Alde batetik, ordenagailu bidezko lana dago, non satelite bidezko argazkiak eta indizeak erabiliz inguru zehatz bateko landareen osasuna nolakoa den jakin dezakegu. Bestetik, tokian tokiko ikerketa egiten da eremu ezberdinetara joanez. Hauetan satelite bidez jasotako informazioa lursail horietan ikusten dugunarekin egiaztatzen dugu, jakiteko bietan berdina ikusten ari garela. Lortzen den informazio hau oso baliagarria da eta Nekazaritza Ministeritzarekin elkarlanean gaude; besteak beste uzta nolakoa izango den jakiteko eta arazoak egotekotan, nekazariekin konponbideak bilatzeko. Berdina ekosistema naturaletan, hauek osasuntsu mantenduz eta kontrolatuz inongo izurririk ez dela zabaltzen paisai preziatu hauetan. Modu honetan lanaren zati bat Unibertsitatean bertan da, baina aukera ere badaukat herrialdeko inguru natural ezberdinak ezagutzeko, ordenagailuko pantailatik atzean dagoena ikusiz.
Ikasle kontseiluko kide ere bazara. Zer nolako jarduerak egiten dituzue?
Ala da bai, Costa Ricara heltzean ikusi nuen nire ikerketa taldekoak nagusiagoak zirela eta ez neukan aukera handirik beraiekin lanetik kanpo egoteko. Unibertsitatean egongo nintzenez ikasle kontseiluarekin harremanetan jarri nintzen kanpuseko bizitza dinamikan parte hartzeko eta jende gehiago ezagutzeko. Hasieratik oso atseginak izan ziren eta nire parte hartzeko gogoak ikustean zuzenean hasi nintzen haiekin batera kurtso hasierako aurkezpen astea prestatzen. Hemen ikasleak martxoaren hasieran bueltatzen direnez klasera momentu aproposean heldu nintzen ekintza ezberdinak prestatzeko: hitzaldiak, kirol erakustaldiak, dantza klaseak eta kontzertuak besteak beste.
Costa Rica ezaguna da bere ingurune naturalengatik.
Lanaz aparte, non jarraipena egiten diegun guneak bisitatzen ditudan, nire denbora librean zonalde naturalak bisitatzen ditut, noski. Costa Rica biodibertsitate aberats horrekin erlazionatzen dugu eta nire helburu pertsonala da inguru hauetara joatea. Orain arte ur jauzietara, sumendietara eta parke naturaletara joateko aukera izan dut. Hauetan paisaiaz aparte tukanak bezalako hegaztiak ikusi ditut eta gure inguruan imajinatu ezin ditzakegun landare exotikoak. Oraindik asko geratzen zait. Bi kostaldeak ezagutzeko gogoak ditut ozeano barea eta karibea, bai eta hemen egindako lagunekin batera haien kulturaz gozatzeko.