Garnicako langileek badaukate data euren postuak berriro okupatzeko Laudioko faktorian: maiatzaren 23a. Hau da, asteleheneko sutearen ostean, lantegia ez da hilabete bat osorik itxita egongo, nahiz eta istripuak gar izugarriak sortu zituen.
Geldialdi horri aurre egiteko, Langile Batzordeak eta enpresako zuzendaritzak negoziatu dute eta enplegua erregulatzeko espedientea ezarri ordez, konpainiako 200 beharginek oporrak hartuko dituzte egun horietan. Horrek esan nahi du abuztuan lanean egongo direla aste bat gehiago. Alegia, hiru asteko oporraldia izan ordez, bikoa izango dute. Horrez gain, abuztutik aurrera adostuta zeuden zubietan lan egingo dute.
Edonola ere, hilabete honetako aste bat -maiatzaren 16tik 23ra bitartekoa- enpresak bere osotasunean ordainduko du eta norberak hartzeko beste bi egun ere egongo dira.
Azkenik, maiatzaren 23an baldintzak ez balira egongo lanera sartzeko, espedientea ezarriko litzateke eta kasu horretan Lanbidek ordainduko du soldaten %70 eta enpresak %85era arte osatuko du.
Asteleheneko sutea
Astelehenean 05:30ak aldera sua piztu zen Garnicako enpresan -lehen 'Maderas de Llodio' bezala ezaguna zena-. Ez zen zauriturik egon, baina irudi txundigarriak utzi zituen ezbeharrak, oso azkar zabaldu baitziren garrak.
Martxoan ere beste sute bat egon zen lantegian eta tximinia batek izan zituen kalteak.